天氣熱到暈, 間中一場雨, 灑落地下令到空氣更升溫, 咁嘅天氣帶兩隻豬仔出去我真係唔敢; 兩隻豬被迫留守屋企我都好無奈, 波波嘅氣管達達個心, 以佢哋健康狀況出外係唔可行; 兩隻豬仔無新刺激祇好成日瞓, 明顯唔開心!
波波有關節移位問題, 令佢舉步困難, 要佢努力練習需要好多鼓勵, 既唔敢強迫又要有限制, 怕佢亂行會磨傷個膝頭仔!
依家每日都跟住P姐姐教嘅手法, keep住幫佢按摩肌肉, 輕力鬆吓筋, 再輔以艾灸照燈針灸筆, 希望保住佢肌肉唔會繃緊, 最怕佢痛痛就頭暈, 每次按摩時摸到佢後腿都仲有肌肉, 無急急流失都算萬幸!
達達呢個刁蠻公主表現好飄忽, 明明見佢健康情況有改善, 一吓子又下沉, 正擔心佢情況轉差佢又彈番起身, 食得瞓得又跑得!
叫自己唔好終日惶惶恐恐咁度日, 要明白'變幻才是永恆', 擔心都無辦法改變, 將要發生嘅都係會發生!
琴晚同阿女去咗睇蘇永康演唱會, 算係偷得浮生半日閒, 已經好多年無參與呢類娛樂活動, 要交低D豬仔點放心; 無形嘅壓力一路累積落嚟, 感覺自己需要一個break, 鬆一鬆再繼續發力, 照顧兩隻豬仔真係要好多心力!
今次唔係第一次聽蘇永康演唱會, 佢算係我鍾意嘅歌手之一, 多年前差不多每日都會聽佢嘅歌, 不過今時今日....
每日播出嘅只會係安撫兩隻豬仔嘅relaxing music, 當然以佢哋嘅需要行頭, priority 一定係number one啦!
今晚, 坐喺紅館有一種講唔到嘅感受, 聽住熟悉嘅歌, 但已經多年過去咗, 過去同現在時空交替, 感慨時間不停留!
 |
 |
| Link:蘇永康《All That Jazz (&Pop)演唱會》 |
為什麼不可以 忘掉記憶中許多 埋藏內心中傷感事宜
為什麼不可以 重新將心清洗一次 如從頭活過一切再開始
永遠心中背負著往時 何以我說易行難太不智
舊記憶 講不出有多重 時刻隱隱作痛 常無意中觸碰....
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
