不在正常狀態 (w/album)

今日萬聖節, Happy Halloween!
早幾日影咗過節相, 都整咗南瓜盅比佢哋應節, 呢個節日本來告一個段落; 不過琴日阿女拎咗萬聖節cookies番嚟, 咁靚嘅design唔捨得唔影相留念, 今日再影幾張啦 :)
呢D曲奇餅有膠袋封住, 佢哋聞唔到香味, 可以一齊影相囉 :)

2013萬聖節 (w/album)

相片連結

2013年快到尾聲, 又到咗10月萬聖節喇!
今年有諗過唔同3隻豬影過節相, 每年都當係大project咁做, 巴巴閉閉咁好無聊; 老公見我咁講佢失笑, 佢話我一個女人仔想做咩偉大事件?
唔係每個都係偉人可以做偉大事, 重要嘅係每日都開開心心, 活好每一天, 想做嘅嘢如果令到自己開心, 唔傷害他人就去做, 那怕係有幾無聊!

突破性進步 (w/album)

相片連結

呢兩日都如常同3隻豬出去, 中午雖然有太陽, 但有風唔熱, 揀呢個時候有一段路好靜, 好適合達達豬; 每行過有太陽曬住嘅地下, 我一定自己先試試, 覺得地下熱就先抱起佢哋, 經過咗再開始!

戴住個黑超 (w/album)

相片連結

今日去街街, 帶備太陽眼鏡, 因為店舖個老闆姐姐話, 喺陽光底下比佢哋用會較接受, 佢哋會感受到陽光無咁刺眼, 眼仔會舒服D啦. 

我都做足準備工作, 同佢哋戴上太陽鏡後抱住佢哋行一段時間,  比佢哋感受吓光線, 再放落地學行; 波波都係個性緊張, 行得麻麻, 我好快同佢除番; 之前有人談及物似主人型呢個論點, 唔通真係啱?

繼續練習

今日又再比波波試戴太陽鏡, 一日裏面練習嘅時間唔多, 店舖姐姐話試嘅時候一定要環境光猛, 如果黑暗佢哋會好驚, 呢D係之前顧客嘅分享!
今日比波波戴住學行, 佢行得好攪笑, 好似飲醉酒咁, 右搖左 搖; 跟住就坐定唔肯行, 然後用手猛撥, 咁我快快幫佢除啦!

狗狗太陽鏡

今日係星期日, 工人姐姐放假, 假期必定多狗狗出去散步, 我應該係唔會出去啦; 不過今日要幫波波攞個太陽鏡, 所以順理成章要帶波波出去, 要試吓邊個size啱; 其實訂咗好耐喇, 喺訂眼仔補充品嘅時間, 就睇到篇文章,  提及狗狗出去見陽光時, 都係最好戴上太陽鏡!

一齊大合奏 (w/album)

相片連結

天氣漸涼, 要整理吓3隻豬仔嘅床鋪被褥, 呢D一定唔可以靠工人姐姐, 事實上佢哋嘅起居飲食我一向都係一手一腳自己嚟 :)

今日拎咗張梳化床出嚟, 咁耐無用D豬仔唔記得晒, 兩隻女貪新鮮鬥快爬上去, 意料之外係達達跑嬴!
波波呢個少爺仔慢條斯理咁行過去, 滿不在乎咁坐咗一陣, 就走過嚟我身邊叫我抱佢上床, 佢始終都要高人一等先安樂!
兩隻女就黐住一齊瞓覺, 想當日達達咁唔接受豆b, 點諗到今日會咁friend!

空間的重要

今日睇咗訓犬師Mack Sir 嘅一篇文章, 解識咗比我知點解波波喺車仔上吠得仲緊要, 正如拖繩一樣, 佢都係感受到環境逃走空間不足, 所以緊張!

但知道咗我都無能為力去改變, 就算上堂學習對我都係於是無補, 我睇到Mack Sir列出三個要點,叫狗主問自己是否做得到, 我有兩個答案都係.....NO!

天氣漸涼 (w/album)

相片連結

琴日中午同3隻豬去街街, 自從波波整親腳仔, 今日係第一次比佢出去落地行, 之前都係比佢坐住車仔出去咋; 觀察咗兩日,覺得都無咩問題, 咁一切如常行番正軌喇!

雖然係中午時間, 但天氣涼咗, 換句話講, 呢個時間都適合狗狗散步啦, 所以琴日都見到有其他狗狗行街街!

護理口腔同眼仔 - Eye Restore Drops, AromaDog Yummy Gum

呢兩隻比對twins用, 達達我攪唔掂啦!

又試新嘢,今次係護理口腔同眼仔嘅用品!
先講呢隻眼仔修復液, 係天然嘅魚肝油, 豆b同波b都好多眼淚, 又會卒吓眼仔咁, 我想試吓呢隻天然產品; 成份係Norwegian Cod Liver Oil, 從來都唔知魚肝油可以滴落眼, 哈哈!

天然止痛藥 - 山金車

內服嘅未到, 外用頂住先, 心安一D :)

波波脚仔事件告一段落, 摒除咗有可能整傷波波脚仔嘅因素,  已經整好個籠; 跟住就諗要放定D藥物等有突發事件, 需要時可以止痛!

早前波波背部有骨刺, 痛到佢唔想郁, 睇醫生都係比咗止痛藥, 然後建議盡量休息- 困籠!
其實我係可以配定呢隻止痛藥備用, 呢隻藥喺獸醫界非常普通,  但最近睇咗一D相關嘅資料, 我唔想再用喇!

thundershirt 舒壓背心

波波隻腳仔好番晒喇, 見佢行得好好, 又開始跳高, 我真係保佢大, 3隻豬裏面祇有佢咁鍾意跳跳紮!

還好達達無跳高呢個習慣, 唔係就慘, Dr.H話佢有輕微膝蓋移位, 接近兩級, 現階段著重保養啦, 希望keep得好佢又唔跳, 情況唔會惡化!
先天松鼠通病幾隻豬都有齊, 氣管差, 關節移位, 尤幸唔算嚴重, 希望佢哋唔會去到要做手術咁差啦!

廢物利用

唔知係咪脚仔仲痛呢, 波波個樣咁愁嘅 :(

當我有懷疑係個籠卡到波波隻脚, 第一時間就上網搵代替品, 唔想比兩隻豬再入籠喇, 咁攪一攪我真係怕怕!

多謝好朋友A同網友G比我意見, 不約而同都叫我唔使買籠, 要解決呢個問題其實好容易, 就係用D物料圍住啦!

網友G建議用矮圍板, 而A就提意用軟膠片, 甚至包書膠都好辦, 主要都係唔比佢隻脚仔卡到出去!

午夜驚魂（續）

表情輕鬆番喇

捱到早上8點, 係佢哋早餐時間, 我嘗試放波波入圍欄; 將食物放喺波波面前, 佢慢慢放低隻腳仔喇, 雖然感覺佢未敢用力, 但好過之前好多啦, 食完早餐仲可以慢慢行, 我個心定好多喇!

有同Dr.Hsiang報告呢件事, 想聽聽佢意見, 不過佢話答唔到我, 好難憑空想像, 唔知係唔係抽筋, 又或者係patella luxation, 又唔知係唔係神經痛, 佢叫我觀察一吓佢嘅腳會唔會放低番!

午夜驚魂

半夜4:30, 完全無睡意, 本來瞓咗, 但比波波嚇醒 :(

如常每晚都放波波同達達入籠, 佢哋從細困籠覺得有安全感卦, 喺籠裡面會瞓得好熟, 我唯有將個籠整得舒舒服服, 鋪厚床褥啦; 無論我買幾多床仔, 咁多年嚟過夜都一定入籠,  已成習慣!

今晚(應該係琴晚喇)如常11點左右放佢哋入籠, 我自己睇咗一陣小說, 剛入夢, 就聽到波波尖叫, 嚇到我成個彈起, 急急跳落床!

適合自己就好 (w/album)

相片連結

生活如常平靜, 週日同3隻豬遊吓花園, 盡量唔出去喇, 平日就揀選中午時間, 避開多人多狗嘅時段, 好似係一個消極嘅做法, 正係斬脚趾避沙虫, 但我真係無其他辦法, 仲未諗得通!

生活模式都係因人而異, 有人鍾意夜夜笙歌廣交朋友, 有人鍾意靜靜品嚐一杯茶讀一本書, 附庸風雅, 總之適合自己就好; 波波同達達唔鍾意嘅嘢我唯有避開唔做, 無謂叫佢哋一出外就加添壓力啦, 一般狗狗正常嘅生活, 強加於佢哋身上都未必係好, 算喇!

今日好激氣 (w/album)

相片連結

週末一般都唔會帶3隻豬出去, 一定會比平日多狗狗出去行, 但工人姐姐週日放假我自己一個攪唔掂, 天氣咁好, 如果唔出去, 又要等到星期一喇, 都係決定出去!

今日仍然係揀中午出動, 但都見有其他狗狗喺街上行喇, 我嘗試用小食轉移波波嘅注意力; 狗狗喺遠處波波神情已經開始戒備, 但仍會接小食入口, 但狗狗逐漸移近, 佢衰到將小食從口中吐番出嚟, 係都要撲同吠, 我真係無晒辦法, 我要點做先可以幫到佢???
反而用小食就避到佢向小朋友吠, 佢行完上番車仔, 有小朋友經過佢都只係爬低, 希望佢可以keep到呢個行為啦!

何謂壓力?

今日又係中午同3隻豬去散步, 咁好嘅天氣點捨得唔出去！ 

近來覺得波波情緒有好轉, 都好耐無同豆b打交喇; 而我同佢散步都盡量做番正向訓練, 當然要配合環境先可行, 如果太多挑戰, 佢會好亂！

perfect嘅散步時間 (w/album)

相片連結

開始踏入秋季, 雖然喺屋企都仍然要開冷氣, 但天氣真係清涼咗好多; 見天氣咁好, 一定要同3隻豬出去散步啦!

一年裡面有咁好嘅天氣真係唔多, 春天潮濕, 夏天熱到嗌救命, 冬天寒氣逼人, 同3隻豬出去真係好傷腦筋;  除咗天氣問題仲要考慮多人多狗, 波波同達達好麻煩嘛！