另類療法 (w/album / video )

相片連結

琴晚深夜同Mi傾咗個長“程"電話, 原先諗住交待幾句, 點知一傾就講咗好耐, 好長氣啊 :)

傾談間佢叫我放鬆D, 一日到晚攪到自己咁忙所為何事? 佢話邊有人養狗狗養到好似我 :P
佢話佢自己都已經好緊張狗狗, 佢嘅朋友都有問使唔使咁啊; 但相比起我, 簡直拋離100倍囉, 佢話人家睇咗我個blog真係唔敢養狗狗囉!

第5次針灸治療

今日達達做到第5次針灸治療喇,醫生話達達反射神經係正常晒, 反應好快; 但對於佢腳仔仲係震同下盤無力,  就好似幫助唔大, 唔通正如醫生一開始所講, 關節移位呢D問題針灸都好難幫忙!

朋友M狗狗都有做針灸治療, 佢有提及一般療程做咗3-4次應該見到成果, 如果無幫助就可以停咗佢喇!

忙忙忙 (w/album)

相片連結

天寒地凍懶出街, 我發覺我越嚟越懶出去喇; 不過又真係無咩時間, 一樣接住一樣去做, 好似剛放低一樣去飲啖水, 鬧鐘又再響喇; 忙忙忙, 忙得有價值我真係再忙都唔在乎, 但達達情況只可以算係差強人意吧; 望住佢令我時時情緒有如過山車咁, 高低起伏, 又上又落 :(

當我感覺佢情況轉好, 正開心努力終於見到成果, 佢就嚟個急轉彎, 腳仔又無晒氣力, 將我心中高漲嘅情緒一下就淋熄; 正當我感覺失落, 唔知係咪應該沿住呢條路走落去, 佢又表現活力澎湃, 叫我啼笑皆非!

如何跟毛孩說再見 - 轉貼

呢篇係一段令人心碎嘅文章, 無論我已經面對過幾多次同我嘅毛孩道別, 但每一次都面對唔同嘅感受, 一樣係心酸!

今日再閱讀呢篇文章, 仍然會鼻酸流淚, 好難去講出呢句"再見"!

場效應治療法 (Field-effect therapy)

波波喺外面做治療, 兩位小姐喺裡面坐一陣好嗎?

休息咗一晚, 達達情況穩定番, 下盤再無搖擺, 腳震無琴日咁多喇, 可能琴日沖涼攪得太耐, 佢太攰啦; 最衰隻浴鹽, 攪到麻麻煩煩.

達達呢個情況當然係未康復啦, 但我都唔想困佢一整日, 咁好慘嘛; 但呢隻豬又好煩, 一放出嚟就博命跑, 佢唔識驚都嚇死我啦, 無辦法只可以分開幾段時間放, 要有休息時間!

時好時壞 - petEsthe浴鹽 (w/ video)

下星期天氣又轉涼, 睇咗7天天氣預告最暖係今日喇, 快快手同3隻豬沖番個涼先啦！

今日同達達沖涼, 試吓幫佢用petEsthe浴鹽浸吓,  我有用呢個牌子嘅扶養泥, 係好嘢嚟㗎, 所以我都放心試用啦!  
因為覺得達達皮毛都係好乾吓, 依家浸微泡浴我無做搽油呢個療程, 諗住浸浴鹽方便D啦!

場效應治療儀(Electromagnetic Effect Therapy Apparatus)

未開機試綁上腰帶, 達達唔抗拒喎

今日聖誕節, 工人姐姐放咗假, 真係好享受屋企咁寧靜, 如果唔係自己怕做家務,  真係無個姐姐喺度最好, 唔會一日到晚比佢攪到我啼笑皆非啦!
我嘅工作如常, 由一早開始就服侍呢3隻皇帝, 然後再靜靜觀察吓達達!

自從做完咗第4次針灸之後, 我開始見到達達嘅進步喇, 最明顯嘅當然係睇佢隻脚仔仲有無震震吓啦; 星期一針完番嚟, 佢一般都比較攰, 會瞓覺, 好少行!

聖誕cupcake (w/album)

相片連結

今年完全無mood同3隻豬影過節相, 連落樓下影番幾張都一拖再拖, 今日已經係聖誕前夕, 聽日係假期一定人多都係免麻煩; 早幾日例行公事咁叫做影咗今年嘅聖誕相, 以為可以收爐喇, 點知阿女又訂咗靚靚嘅cupcake比我, 手功做得咁靚點捨得唔影低佢吖, 簡單做個背境都一定要影吓!

達達第4次針灸 (w/album)

相片連結

今日達達第四次針灸, 由察覺佢腳仔無力,  轉眼有一個月喇, 時間真係過得快！

達達做呢個針灸治療, 效果唔係上網嗰D形容得咁神化, 但每次做完都見到有些微改善, 唔係無改進, 係未到最好啦; 我之前都猛睇資料, 大都係話急性嘅椎間盤問題, 反而針灸效果好快就見, 但慢性嘅, 就要時間慢慢改善; 急性嘅椎間盤問題比慢性嘅傷害更大, 還幸達達應該算係慢性, 我唔介意花更多時間, 只要佢有好轉!

無晒時間 (w/album)

相片連結

自從達達椎間盤出事真係好忙, 每日從早忙到晚, 都唔知點解無晒D時間 :(
 
一早從8點開始餵早餐, 10點又要餵藥比達達, 醫生話幫助血液循環嘅藥要空肚食嘛, 都想同早餐時食嘅甲狀腺藥隔開少少啦.

中午12點餵午餐,  餐後一小時內唔適合做按摩同艾炙, 到下午1點後就同達達做呢個治療喇。

預祝2013聖誕 (w/album)

相片連結

終於都同3隻豬影咗今年嘅聖誕相, 近日達達嘅脊椎出事令到我好忙, 主要係個心一直都唔安樂,  根本無晒mood囉!
今次係咁多年來第一次影過節相會當係例行工事, 所以完全無心機諗點去佈置, 真係隨便過隨便拎出幾個公仔, 反正最重要都係有3隻豬仔嗟!
我希望我可以同佢哋共渡好多好多個快樂聖誕, 然後......
呢D相片日後會係我一個好珍惜嘅memories!

艾草枕

琴日達達做針灸治療期間, 同Dr.Sam傾談,  佢問我有無幫達達做艾炙呀? 
梗係有啦, 我係勤力媽媽,  點會偷懶 :)
 
呢兩日同A喺度研究“場效應治療儀”, 呢個係乜東西, 事關我轉貼嘅文章中, 有提及呢個儀器, 話對不良於行嘅狗狗幫助好大, 因為會打通經絡加強血液循環, 我有向Dr.Sam請教!

第3次針灸療程

等緊入去針針

呢兩日氣溫驟降, 仲要落埋雨, 真係凍死人, 無必要真係唔想出街; 喺屋企開咗暖爐, 爬上床冚住被, 真係好歎嘛!
不過今日要帶達達豬出去,  要見醫生做第三次針灸治療; 天氣咁凍我無諗過自己, 但就好驚冷親隻豬, 養狗狗感情可以昇華至此, 係一種福氣還是係傻氣?

一踏出大門, 已經感覺寒氣逼埋嚟, 雖然我幫達達著咗衫, 都係好擔心冷親佢, 真係唔想多生枝節將個療程拖慢,  如果冷病隻豬女就麻煩!

預防勝於治療

今日老公幫達達做艾炙, 達達豬最嗲爸爸啦, 我鋪好暖氈準備好物料, 就叫老公幫達達做喇, 今日我做揸機影番幾張相啦 :)
 
達達見到爸爸拎住艾棒, 已經乖乖咁瞓低, 郁都唔郁咁配合晒, 仲好放鬆好快瞓著添, 難怪老公咁錫佢啦! 
哼...我好妒忌啊, 枉我撲嚟撲去為呢隻衰豬揾料揾醫生, 喺佢心目中我嘅地位都係唔及爸爸咁大.....

加把勁啦 (w/ video)

由察覺達達豬後盤無力去睇醫生, 再轉介專科, 然後開始針灸, 到今日都有20日喇, 專科開嘅幫助血液循環藥都食咗有12日, 針灸都已經做咗兩次; 但我都係無覺得達達有好明顯嘅好轉, 還幸都無變差!

Dr.Tint叫我限制達達活動範圍, 我以為困圍欄就OK喇, 困籠要尿尿時就無咁方便, 有時唔為意佢呱呱叫, 都痾濕咗幾次喇; 但呢隻豬喺圍欄又一D都唔安份, 整日都兩頭行, 係無休息啦; 無辦法除咗便便時間, 都要困番籠喇!

狗狗椎間盤突出的治療 - 轉貼

每月約有30狗隻須接受此手術，平均每日一宗，病患會令狗狗突然雙腳癱瘓，主人傷心，小狗痛不欲生！所指的正是被一般人誤稱為「骨刺」的椎間盤突出症，恐怖程度僅次於癌症，可在沒有先兆的24小時內令狗狗雙腳突然癱瘓，大家務必了解此症狀做好防準備。 

人生總有遺憾?

人生係咪無完美嘅呢? 做人係咪一定要有缺憾? 正當我覺得自己嘅一生都算了無遺憾, 我好感恩!
上天就嚟同我開個玩笑, 佢指派咗呢8隻寶貝比我, 測試吓我嘅耐力係咪勝於常人, 所以要我一關一關咁過啦!

以前養5寶, 當佢哋有唔舒服, 我都一樣心驚膽震, 尤期係同叻叻共渡嗰段時間, 真係唔想再望番轉頭!
以為今次養呢3隻豬仔, 自己已經係經驗豐富, 只要小心D, 應該掌握到!

身體保養 (w/album)

相片連結

今日3隻豬都做艾炙, 波波腰仔都有骨刺, 豆b關節都需要保健, 達達嘛....係主角嚟:(
咁就一齊做個身體保養, 等佢哋血液循環好D啦, 達達豬跟醫生指示做15分鐘, 對twins做10分鐘OK喇!
我用一個合適size嘅腰枕托住佢哋嘅腰仔, 佢哋會舒服D, 可以卸下力啦!

試做艾炙 (w/album)

達達會乖乖針針, 一定會好番
相片連結

琴日係我嘅正日生日, 簡簡單單喺屋企食一餐啦,  因為要帶達達豬去針灸啊; 不過阿女都比我一個驚喜, 佢再買咗一個豬仔蛋糕比我, 佢話知我鍾意豬仔喎, 我個心甜過個蛋糕啦!
豬仔豬仔, 我今次真係鍾意到要食咗你落肚喇，wahahahaha.......

達達豬第2次針灸

本來都OK㗎, 越等越緊張啦

今日第二次帶達達豬針灸, 佢到咗診所好緊張, 反晒白眼, 攪到我都緊張埋; 等咗一陣入去診症室, 醫生先同佢檢查, 好小心按壓過晒, 都係無痛嘅反應, 咁其實情況唔係太壞, 本來想達達行嚟睇吓, 但達達邊敢行磚地吖!

今日都係落13針, 背脊8針脚仔5針,  達達算合作喇, 都無典來典去, 因為醫生已經知佢性格, 唔比佢望到啦; 我都係企係佢面前同佢傾偈, 隔一段時間醫生會check吓D針有無鬆啦!

生日願望

最近又不停上網搵資料, 當然係為咗達達嘅椎間盤突出症啦, 睇咗好多病例, 都係可以做針灸復康; 有狗狗後肢已經癱瘓,都可以用針灸復健, 達達豬情況未係咁壞, 做多幾次針灸, 應該會見到效果啦!

聽日係我嘅生日, 今年嘅願望除咗大家都身體健康, 當然係對達達康復好大期望!
多謝老公同阿女安排今日同我慶祝生日, 因為聽日我好忙; 聽日我嘅生日節目, 就係帶達達豬針灸治療, 亦有D問題要請教Dr. Samuel Wong !

寵物針灸 - 轉貼

針灸是中國傳統的醫學療法，世代得到海內外華人的信賴。針灸不止對人類產生效用，就連動物針灸也能做到一針病除。針灸療法在不少國家得到認可和接受，美國獸醫如今開始將這項技術應用在寵物身上。

狗狗老了??

近日因為達達脊椎問題, 多留心咗有關呢方面嘅資料, 大家都要留心自己嘅寶貝, 尤其係當佢哋年紀漸大,  有好多微少嘅改變, 係身體機能正在倒退嘅指標!

下面嘅連結, 大家不妨睇一睇, 有好幾點我都喺達達身上發現, 請多D留意你嘅毛孩!

一水隔天涯 (w/album)

做完針灸嘅達達好攰
相片連結

琴日達達豬做完針灸, 醫生話佢會攰D, 果然番到屋企, 除咗我叫佢尿尿同食餐, 佢淨係瞓覺!
休息多D係好嘅, 睇咗3個醫生都話要絕對休息, 尤其係近呢兩星期, 咁達達豬瞓多D都OK嘅！

今日起身達豬比琴日好D啦, 無咁眼瞓喇,  佢情況暫時未見好明顯嘅改善, 都有腳震震啦; 不過針灸係需要循序漸進, 我雖然係一個心急嘅人, 但都有合理嘅想法,  我明白要比多D時間!

開始針灸治療

達達豬等緊見Dr.Sam

上星期約好時間, 排期到今日, 今日帶達達豬開始針灸治療!
其實我都有擔心㗎, 達達豬咁敏感, 點肯比人掂呀? 仲話要針針, 話唔痛都總會有感覺嘛, 佢會唔會典嚟典去, 典到癲咗, 落唔到針㗎?
預早少少去診所啦, 今次地點好近地鐵站,  即使我係路盲, 都好易搵呀!

踏上長征路途

粉紅豬達達

琴晚真係瞓得好差, 心裏面有件事放唔低, 成晚半睡半醒狀態!
今朝一早起身,  灌番杯咖啡先, 要努力頂住, A話閃唔到過嚟陪我, 咁唯有自己面對啦!

一出屋苑門口上的士, 行咗一陣司機就問我點去, 要行登打士街定染布房街?
唉, 又嚟! 我鬼知咩, 已經心煩, 又總係遇到呢D司機, 唔好話我係第一次去, 去咗幾年見Dr.Hsiang, 你問我點去都係唔識㗎啦:(
我答去到就得啦, 任得你點樣去, 心情真係唔好, 一早就唔順利, 一D都唔lucky!

明日見專科

聽日就帶達達豬見專科醫生, 當診所姑娘來電提醒我應診時間, 我個心突然狂跳起嚟, 自己有事都未有咁驚, 湊狗狗就成日比佢哋嚇到心驚肉跳!

由最初養bebe開始, 到佢抽筋心臟病, 及後每一隻都有不同症狀, 每一次面對都好徬徨, 呢D真係唔可以話見過就會放心得落, 真係好難形容嗰種感覺,  就係咁震騰騰....一關一關咁過！

艾灸 (w/ video)

同達達豬積極"水療" 效果唔錯, 浸咗兩次帶氧微泡浴後, 佢脚仔好番好多喇, 我個心都安定咗!
照咁睇達達情況應該唔係太壞卦, 我同佢浸浴做吓按摩, 佢都好咗咁多, 帶氧微泡浴有增強佢血液循環嘅效果, 咁做針灸治療應該更加唔錯, 我諗.....專科醫生都唔會叫開呢刀囉, 自我安慰先啦, 仲有幾日先見專科, 都要等日子容易D過嘛!

牙齒保健 - Leba III

狗狗牙齒保健真係好重要, 大家都知道如果牙齒有細菌, 會對健康有幾大牽連, 輕算係牙週病啦, 牙齒鬆脫； 重, 細菌入血, 上腦, 入心臟, 唔使講都知係對生命有危險啦！ 
我一直都好擔心, 好關注, 但我呢3隻豬, 完全唔比我清潔牙齒 :(

孤軍作戰 (w/album video)

相片連結

達達豬情況真係唔好, 見到佢行得咁差, 真係無晒心機喇; 又唔知佢邊度出事, 因為X'Ray係穿透唔到D軟組織啦; 從片中就睇到腳仔有問題, 但椎間盤有無事都係要由MRI去決定, 達達又似乎未去到呢步, 所以Dr.H建議達達見一見專科, 因為專科醫生見呢類嘅case多, 或者可以從X'Ray判斷係咩症狀, 會得到一個大概結果!

我仲有無得揀

達達等緊見醫生

一早起身就兩頭騰, 從來都唔覺時間過得咁慢, 幾時先到食晏時間?  食完中午餐要準備同達達豬去街街, 不過....今次佢一定覺得唔好玩!

多謝Mi同A都比我支持, 都有pm我仲要喺同一時間, 夾到咁啱!
當然佢哋分析達達情況比較中立,  一向都有話"旁觀者清, 當局者迷"啦;  但另一方面, 達達情況我最清楚,  佢哋係聽我描述, 而我觀察達達, 係用我雙眼, 我係有理由咁擔心㗎!

如末日來臨

等待係漫長而難忍嘅, 達達嘅問題, 我琴晚一直上網搵, 越深入瞭解, 個心越震, 佢真係好似係椎間盤壓住神經線, 如果係咁, 我真係有如末日來臨 :'(

睇他人嘅例子, 同自己切膚之痛, 真係感受好深; 明日會唔會得到確診? 還是有需要轉介到專科做檢驗, 個心七上八落, 個人就好似失咗七魄三魂!

水上運動 (w/album)

相片連結

3隻豬浸微泡牛奶浴, 梗係達達豬浸第一啦, 呢部機都係為佢而買嘛!

達達豬落水後好緊張, 唔肯坐低, 全程企住咁會好攰, 我唯有安撫住佢啦; 由開始一路我都用雙手將佢傍住, 咁佢先安定落嚟,  識笑番!

7歲生日快樂！

相片連結

11月24日, 係達達豬嘅正式生日, 雖然早兩個月有同對twins一齊慶祝, 但正日我都會再做少少慶祝, 簡簡單單啦！
祝願達達妹妹身體健康, 唔好咁多毛病喇, 仲有希望佢唔好再甩晒D毛毛啦! 不過睇情況呢個願望都好難實現, 我都作咗最壞嘅打算喇!

小麥草 (w/album)

相片連結

我對種植從來都無興趣, 見到朋友種植花草樹木有聲有色, 我會覺得好靚, 但唔會羨慕, 無興趣好難勉強!

早幾個月嘗試種小麥草, 當然係為咗3隻豬仔好啦! 
一直都知道小麥草對身體有益, 但要我去種植對我真係好有難度, A鼓勵我做個嘗試, 佢話好容易種得到; 佢送咗種子比我, 清楚提示方法, 但.......我都係種唔到!

再度提起黃絲帶

今日早咗D出去, 下午唔得閒!
雖然太陽唔大, 都係戴番太陽鏡啦, 對twins眼仔麻麻; 豆b都好D, 唔會矇矇眼, 但眼水超多, 都唔係咁好啦; 波波仲差, 超敏感, 大風D, 光D都會矇眼 :(
由一歲開始就去vet度睇眼, 唔同vet都check咗好幾次, 都話無事, 希望純係敏感啦!

唔會再出新難題 (w/album)

相片連結

琴日先同達達沖咗牛奶浴, 今日對twins要暫停, 一來今日無食水供應, 二來又話個架嘅高度唔太適合, 影響咗微泡嘅密度反應; 如果想要效果完美, 最好將個高度降番低D;  諗咗咁耐先決定買部機, 梗係想效果更完美啦, 又要再訂過幾條支柱, 等速遞再送嚟!

達達做Milky SPA

今日終於送咗部牛奶浴機嚟喇, 即刻同達達豬做個MILKY SPA,  一開始我祇敢比佢試浸短短10分鐘, 寧願循序漸進, 希望有一個好嘅開始; 因為達達豬情緒比較難處理, 唔想佢受驚太激動, 希望佢會識享受呢個浸浴啦!

豬朋狗友 - Rescue Remedy (w/album)

相片連結

寫咗呢個blog, 交咗好多無"豬朋", 但有"狗友"; 佢哋都係廿四孝媽媽, 志同道合 :) 
我哋嘅話題大都係環繞住狗狗嘅生活內容, 不過最常分享, 係狗狗嘅補充品!

milkySPA牛奶水中增氧機

http://www.natureblessent.com/#!microbubble-pet-spa/c1oda
http://senham.com/simple_page.asp?sid=21 
http://www.全生活.com/


見到達達毛毛開始羊毛狀, 驚佢嘅脫毛症又再番嚟, 早作好準備, 又用個新方法睇吓幫唔幫到佢!

因為TT同van 仔做牛奶浴都得到好成績, 我經過考慮後都決定買部機番嚟; 一來唔怕外面嘅美容店消毒得唔徹底, 二來喺自己屋企希望達達豬會relaxed D!

近日為咗比較各個牌子, 猛咁搵料猛上網 :) 
塵埃落定, 終於選好咗我心儀嘅SPA機, 過兩日就會送嚟; 選呢個牌子當然價錢高低係好大關係, 而其中仲有一個重要因素, 係有香港代理, 萬一有咩問題我希望會跟得好D!

女裝眼鏡

豆b戴咗呢個眼鏡, 唔識耷低個頭, 合埋對眼, 仲透晒大氣 :(

週末無同3隻豬出去, 一來都係怕多人多狗, 二來都要比D時間出嚟, 拆咗車仔嘅車蓬坐位去清洗, 呢個清潔行動我會請工人姐姐每個月做兩次！

今日約咗幫豆b攞太陽眼鏡,  要帶住豆b出去試試!
今次訂咗個粉紅色比呢隻豬(其實我都無咩款色可以選擇, XXS碼嘅眼鏡實在好少), 戴住個女裝眼鏡, 就個個都知佢係女仔嚟啦 :)

世事無絕對 (w/album)

相片連結

今朝早起身覺得有D寒, 望出外面太陽又唔曬, 都有D凍嘅感覺; 不過無落雨天氣唔錯, 就同佢哋去街街啦!

咁大風同豆b著番件衫仔, 呢個係潺豬嚟; 達達近日都滲少少鼻水, 做多D啦同佢著埋喇, 不過佢好抗拒, 同佢著衫好似要打交!

微泡牛奶浴

van仔做帶氧微泡浴

FB睇到van仔媽媽嘅分享, 之前佢出過post話因為照咗廿幾張x-ray引至狗狗甩毛同皮膚黑晒, 佢會用另類治療,  如果成功生番毛毛, 就同大家分享過程!
終於揭盅喇, 原來van仔係做咗微泡牛奶浴, van媽話好work!

唔再諗咁多喇 (w/album)

相片連結

今日同對twins沖涼, 食完早餐就開始, 先沖豆豆啦!
豆b沖涼好乖, 完全無難度, 好快就沖好喇, 但一開始吹毛, 真係好麻煩; 唔係煩在佢兩頭郁, 係怕咗佢扯晒氣咁呀; 我吹咁耐佢就喘咁耐, 攪到我好擔心啦!

今日都好開心 (w/album)

相片連結

今日天氣好好, 決定早D出去！
都係波波行先, 落地時就戴番太陽鏡, 佢已經唔會再亂撥亂抓, 習慣晒喇; 戴住太陽鏡嘅豬仔, 好吸引途人目光啦, 每次都遇到有路人話佢得意㗎; 但呢隻少爺仔從來都唔會停低比人影相,  拖住我係咁跑, 想同D街坊傾兩句都唔得啦! 
我又一定唔會強行拖住佢停低比人影相嘛, 去街主要都係要令佢開心啦!

希望有轉機

搽油著衫等一晚, 第二日沖涼

3隻豬距離上次沖涼又兩個禮拜喇,  又到沖涼時間,  時間真係過得好似閃電咁快!
今日主力攪達達, 搽油後要用好多時間,  對twins就星期6先沖, 反正週末唔會去街街!

琴晚同達達搽咗油, 用咗好多油都好似唔見晒,  又唔覺得佢嘅毛毛吸收咗睇落油潤, 又唔覺D皮膚滑潺潺, 總之我就一路撥開毛髮一路搽, 毛毛睇落仍然一樣咁羊毛化, 但D油又唔見晒??

新拖帶

天氣麻麻, 成日想落雨, 又好似凍咗D, 今日好似大家都無mood出街, 3隻豬仔縮吓縮吓咁瞓晒覺喇!

豆b對天氣轉變超敏感, 已經開始打乞嗤, 即刻拎張Angry Bird床仔出嚟同佢換季, 等佢怕凍時就匿入去啦!

小小萬人迷 (w/album)

咁樣甩法, 會幾耐甩光?

天氣漸涼, 達達又快變隻甩毛豬仔喇, 由佢毛質開始改變, 我都預咗呢個甩毛症又再循環!
每日同佢梳毛, 都用上唔少時間, 因為毛質變咗羊毛化, 會好容易糾結埋一齊; 我會先用個寬齒梳慢慢梳通佢嘅毛毛, 咁已經甩咗好多毛毛出嚟喇, 跟住再噴神奇水, 全身按摩後, 我全手又黐滿晒毛毛啦:(