最後一面 (w/mp4 - Never Be Forgotten)

過去幾日, 都無感應到達達返家, 可能達豬都係親近爸爸, 不過老公無咁敏感, 問佢都徙氣喇！
一直等到今日, 達達火化, 要接達豬返屋企啦, 好似發緊夢咁, 心情複雜 ....

別了, 達達公主！（w/mp4- fly)

達達終於喺今早7:05am離開,  我陪喺佢身邊睇住佢呼吸變淺變慢, 到停止呼氣; 呢個係我一直期盼嘅離開過程, 無掙扎好平靜, 咁樣離開算係修得來嘅福氣!
為佢唔再堅持鬆一口氣, 但又好傷心面對別離!
祝福達達一路好走, 快啲去搵波波, 你哋已經分開咗一年多!

悲傷的生日

達達仍然瞓到昏沈沈, 維持住淺薄呼吸, 即使我用針筒嘗試餵少少水濕潤吓佢嘴仔, 佢脷仔想郁動都唔得了; 無數次叫乖女唔好再堅持, 唔好不捨唔使掛心, 但佢聽若罔聞好固執!

昏睡狀態

一連幾晚通宵守住達達唔敢瞓, 頭暈暈!
呢幾日心情大起大跌, 達達突然發病更急轉直下, 我好難接受, 無諗過別離一下間咁接近, 無可能!

撕心裂肺

星期日, 工人姐姐放假, 佢一早入嚟我房睇達達, 同我講出去喇; 然後望住達達問佢有好轉嗎? 我答估計情況唔樂觀, 佢即刻喊住同達豬say goodbye!

我好希望係我估計錯誤, 我好希望達達會過到呢關, 原來覺得自己已經識handle, 但到最後都一樣心痛到撕心裂肺，好肉赤已經奄奄一息嘅達達！

路都係咁行

 

深夜, 極度煎熬嘅一夜, 相信達達離開我嘅日子唔遠喇!

本來, 仍奢想佢有機會好返, 雖然過咗一晚佢無大進步, 但都有些微改善嘛, 況且一整日佢都表現平穏, 可以好安靜咁瞓覺, 表情放鬆, 我以為佢會過到呢關....

腳仔撐撐

經過咗憂心忡忡嘅一晚, 唔覺達達有大進步, 佢仍然郁動有困難, 想尿尿時會發出聲音, 瞓喺度腳仔撐撐!

見到佢兩隻腳都有郁, 依家仲有右前手硬曬, 不過琴日係半邊身僵硬, 兼且頭仔向一邊拗, 似乎今日就有好轉, 頭仔姿勢正常返, 亦無再流口水喇!

打破宿命

 

達達突然冧咗, 好突然！

早餐午餐如常食得好自然, 無扭計要餵, 自己乖乖食完, 隔咗一陣發出一啲怪声響,  以為佢要尿尿, 放佢落尿墊就突然跌低, 發覺佢一邊身偏側, 即刻抱起佢見佢狂流口水, 眼神呆滯全身乏力咁往我懷中跌....

祝福15歲嘅達達豬

今日係達達15歲生日, 以一隻1.5kg嘅小型犬來講, 行到今日, 已經係比上不足, 比下有餘, 好叻女了!

不過唔讚得, 怕咗佢小器, 而且真係可以話佢好叻豬? 

其實有好幾次, 都以為佢唔想再行落去, 但呢個女都唔知打咩主意, 一下間又好似無晒事, 都係老人家一貫狀態, 時好時壞, 今日唔知聽日事!

專人服侍

真係好怕達達無端端要去瞓波波張床仔, 尤其係打風嗰幾日, 佢一連兩日都嘔咗一次, 精神又差死死哋....
我又會擔心佢係都要典過去, 有無特殊意思😖?!

老咗好多了

8個陶土公仔, 祇有達達可以同個公仔影張合照

呢一年來, 達達明顯各方面都表現差咗, 心理上應該係波波嘅離開, 佢失去良伴感情上有失落, 生理上應該係年紀大咗器官退化, 氣力不比從前; 雖然無見到有具體病徵, 胃口還算OK, 但吸收方面大不如前, 我感覺佢呢一年真係老咗好多了!

中秋節2021

中秋節快樂!

又到中秋節, 達達祝大家月圓, 人圓, 事事圓滿; 人緣, 福緣, 緣緣不斷!
今年, 阿女拎咗盒朋友送嘅限量版月餅返嚟, 特別在係SPCA一百週年紀念, 同tama and friends聯乘系列, 個設計好靚, 咁就同達豬影返張相留念!

不熄不滅

又到咗September 9月, 波波生於呢個月亦死於呢個月, 我一定唔會忘記呢個月份!
到今日波波已經離開咗一年, 365日長唔算長, 但亦唔算短, 但佢離開我當日嘅情境, 當時嘅每個片段, 仍歷歷在目近在眼前, 我真係好想緊緊捉住佢手仔, 唔想鬆開唔捨得同佢分別😭....

Happy 15th Birthday in Heaven (w/mp4)

豆b, 波波, 生日快樂!

一轉眼又到咗九月, 幾年前, 接近踏入九月, 我已經開始忙忙碌碌, 為你哋即將到來嘅生日打點; 巴巴閉閉咁畫佈景, 為你哋構思特別嘅生日食物，為求人狗生活中都有一個特別精彩時刻！ 

溫和進補 - 野生冬蟲夏草

達達比以前減咗體重, 佢有正常飲食但維持唔到原來體重, 當然唔好!

不過, 雖然佢體重係減輕咗, 但目前情況穩定一切睇落尚好, 我唔敢有太多改動, 但任由佢減重又感覺唔好, 又唔可以硬塞更多食物落佢肚, 佢應該係吸收得唔好!

感官靈敏

生活看似平靜, 我就唔再多諗!
自從改變方針, 減去達達唔鍾意嘅supplement, 佢每餐都食得開開心心; 以前佢唔食我會手餵, 佢都合作肯吞, 但我細想, 如果佢鍾意食根本唔需要我手餵, 而佢只係順從我而吞, 咁點會食得開心?

剎那永恆

之前睇過某動物傳心師嘅留言, 加上睇過好多有關同毛孩相處嘅書本, 再加上咁多次同狗狗嘅永別, 我的確有咗少少改變!

有8寶陪住

達豬係老baby

天氣太熱, 唔敢帶達達出去, 依家每逢天氣變異都感覺佢有啲怪怪哋, 瞓覺都反來覆去, 以前佢對天氣變化無咁敏感, 可能年紀大咗對氣壓轉變感覺差啲; 幸好有制氧機, 適時放佢入去, 佢都好樂意！

時間與空間

最近我嘗試自己做陶土公仔, 第一個係模仿樂樂, 老實講一開始真係好enjoyed, 從無到有由一舊陶土做到一個型狀，過程好有快意!
一早知道做呢種手功唔容易, 但親手做起上來先感覺到個難度, 左改右改都唔滿意, 要克服意志, 唔好虎頭蛇尾!

探討制氧機

達達最近健康情況反差好大, 表現就如過山車咁忽高忽低, 好嘅時候會自己乖乖進食, 唔使拎住個碟放口邊不停鼓勵, 代表胃口好好因為唔使手餵; 養高齡豬仔要求真係會越來越低, 去到手餵肯吞就餵都無所謂,  最怕係對食物抗拒一路餵一路吐, 千百種食材配搭每次要唔同, 不停諗計仔....
養高齡毛寶嘅家長一定有共鳴, 我已經行過好多次呢條路, 祇要佢肯食點刁鑽嘅配搭都在所不計!