出齊八寶 (w/album)

相片連結

琴日同個刁蠻公主達達冲涼, 呢個女依家好難服侍, 曾經一度佢乜都好少理, 你幫佢做乜都唔抗拒...
時移勢易, 都唔知發生過乜事, 呢個女變得好挑剔, 乜都唔合佢意思, 惡死騰騰成日閙人, 真奇怪狗狗都會轉變個性😅!

都唔可以每事順佢心意, 唔通做污糟豬咩, 唔鍾意都要冲涼, 仲要修剪毛毛先完事, 我諗佢好唔耐煩好激氣, 全程黑口黑面, 不過我話之佢😜!

做錯決定?

今日襯住天氣回暖, 趕快幫波波沖涼, 近排密密出入診所, 好怕有病菌感染, 個心總係有D唔安樂; 但又唔敢輕舉莽動, 怕佢眼仔有傷口未復原, 萬一有水彈咗入眼, 個傷害可以覆地翻天, 我真係唔敢行事貿然!

2017聖誕 (川貝鱷魚肉湯粉)

波波達達祝大家聖誕快樂!
好多謝朋友們無忘記豆b, 今日祝3隻豬仔聖誕快樂, 佢哋話心目中一直都係有3隻豬, 永遠都係!
聽到佢哋咁講, 好感動, 又眼淚盈眶, 可能剛backup完D video, 個腦充斥住豆b, 記憶猶新, 特別激動!
豆b呢個開心果, 依家喺彩虹橋上自由自在, 唔使講一定大快樂啦!

彌足珍貴

琴日做冬, 但阿女同我都未病好, 幸好我開到把豆沙聲, 不過勁喉嚨痛; 今年唔出去食喇, 一家齊整分享係重點, 食乜都咁好!

琴日我有最重要嘅節目, 要帶波波眼科覆診, 經熊醫生檢查後話暫時穩定, 傷口亦已結痂, 日後只需小心保護; 維持住滴眼藥水, 可以兩個月後再覆診,  如無突發事故!
算係暫時鬆口氣, 希望唔好再節外生枝, 但願可以好好維持住!

公主嘅賞賜

今日一早食完早餐, 達達公主賞賜咗我佢嘅poo poo, 叫我咪再煩; 呢隻豬真係激死人, 係都要搵D嘢同我玩, 係咪呢排我注意力集中咗喺波波嘅眼, 公主唔順氣呀?!

總係要擔心

我真係好怕病, 咁係人都怕病嘅, 但最慘次次都失聲嘛!
好彩星期一帶波波見梁醫生時, 仲可以講嘢, 希望過兩日帶波波見眼科熊醫生, 已經開返聲啦!

永恆的開始

又一位松友嘅狗狗上咗彩虹橋, 好難過！
小松松同豆b病況唔同, 但年紀體型同豆b頗接近, 最後治療選嘅都係相若嘅路, 目的係要小朋友剩餘嘅日子活得舒服; 最近有同媽媽密密通訊, 所以感覺同一般狗狗遠走有D唔同; 雖然得知小松已病重, 亦唔想佢久延殘喘再受苦, 但要面對別離, 仍係心痛!

幸福嘅定義

從幾隻豬仔身上, 每日都有新嘅學習!
概括咁講, 最能夠體會到嘅 - '幸福唔係必然'; 而幸福嘅定義, 可以係好平凡, 甚至可以係之前你唔想面對覺得極麻煩, 有一日失去嘅時候, 你會對呢D麻煩極期盼!

情緒被帶動

忙忙忙, 忙完一輪稍為鬆一口氣就感冒, 咳到聲沙兼頭痛; 可能之前潛意識叫自己一定要頂住, 根本無病嘅空間, 點都要硬撐!

雖然病係辛苦, 但精神反而放鬆, 見到波波慢慢康復, 雖然眼仔睇唔到已成定局, 但佢肯開始慢慢行, 表情無咁茫然苦惱, 我見到個心無咁痛!

啞口無言 (w/album)

相片連結

琴晚達達瞓得唔好, 反來覆去脚撐撐,  都知佢有麻煩😞! 
達達平日都會打乞嚏, 鼻仔敏感卦, 佢呢個症狀我都無晒辦法, 一日兩三次我由得佢啦; 近日天氣轉變對佢就有挑戰喇, 即使我再小心, 監察住屋企嘅溫度濕度, 都保唔住佢鼻仔塞晒同呼吸有變化😖!

like mother like son

琴日係我嘅生日, 無諗過會慶祝, 阿女出差未返, 波波眼仔又出事, 自己無曬興緻; 一早起身如常服侍兩隻豬, 生日日子都已忘記; 餵完兩隻豬望吓手機, 見到朋友道賀先記起, 再收到遠方姐妹嘅whatsapp, 仲有阿女訊息話趕及轉機, 唔使等下一班次!
佢話會趕到返嚟, 趕及同我慶祝生日, 其實對於慶祝與否我全不在意, 不過佢咁有我心, 我當然歡喜!

自己嘅幸福

琴日又帶波波見熊醫生, 檢查後話眼仔嘅傷口已埋, 呢個真係我最好嘅生日禮物😄, 經此一役, 我會加倍小心, 白內障眼仔易感染發炎, 以後要更留神喇!
醫生叫兩星期後再覆診,  總之無入侵性嘅檢查, 我一定配合, 姑娘讚我呢個媽媽好乖好有愛心😜!
主要係波波並唔抗拒檢查眼仔, 咁比醫生睇睇我會更放心, 依家宗旨係配合波波, 佢太抗拒嘅檢查就由得佢, 無謂攪到佢要惶惶恐恐咁度日!

朦朧嘅領悟

今日帶波波見梁醫生, 睇睇早幾日驗尿嘅報告, 上次蛋白尿ratio係0.146, 今次係0.1; 今次係西藥減半加用中藥調較後嘅成果, 成績好好, 會繼續咁做, 直到停晒西藥, 睇情況再決定下一步!

成績咁好, 但出奇地我無特別開心, 比較起之前知道佢有大進步時嘅激動, 感覺好唔同; 身體狀況實在有太多突發事, 太多預料唔到嘅變數, 有可能呢樣好咗其他有變差, 只係做唔到血檢我唔知道!