不熄不滅

又到咗September 9月, 波波生於呢個月亦死於呢個月, 我一定唔會忘記呢個月份!
到今日波波已經離開咗一年, 365日長唔算長, 但亦唔算短, 但佢離開我當日嘅情境, 當時嘅每個片段, 仍歷歷在目近在眼前, 我真係好想緊緊捉住佢手仔, 唔想鬆開唔捨得同佢分別😭....

靈魂回歸 (w/mp4 - 下輩子不一定還能遇見你)

日子過得好快, 一個月又一個月, 轉眼間波波離開我已經十個月!
呢段期間, 我確定波波係有返過嚟, 即使我唔一定每次都見到佢; 最近, 呢個講法連工人姐姐都同意, 當我問佢係咪有見過波波, 佢搖頭, 但佢指住波波張床仔!

強烈對比（w/mp4 - Memory)

波波離開第8個月, 做咗呢個我最有感觸嘅視頻!

前一段日子, 曾喺FB上睇過一個video, 探討毛孩離世後會去咗邊度; 研究顯示肉體消亡後, 靈魂會喺我哋嘅維度裡停留一段時間, 而因為毛孩無條件愛我哋, 所以即使佢哋肉身已離開, 但我哋仍會感受到佢哋嘅陪伴, 慢慢佢哋就會離開去下一個緯度另一空間!

從0歲開始回憶（w/mp4 To Where You Are)

波波離開第七個月, 乖仔嘅一舉一動仍鮮明活喺我腦中, 但我真係好怕經過年月洗禮, 所有印象會唔再深刻變模糊!

記憶真係要每日運行, 我唔要忘記波波嘅每個舉動, 琴晚又再為波波做個紀念視頻, 今次由佢BB開始, 從佢第一日返來屋企到佢歲半之前, 重溫佢嘅前半生; 還好睇住相片都仲記得當時嘅動態, 印象仲係活生生!

再世重逢 (w/mp4 醒不來的夢）

今日係波波離開咗四個月喇, 祇要我一想起佢, 想抱抱佢但再抱唔到, 就感覺好心痛!

早幾日同阿女閒談, 我話點解我只係聽到波波嘅叫聲, 其他咁多個毛寶寶嘅聲音我從來無聽到?
阿女話因為我最鍚波波!

思念是另一種方式的擁有 (w/mp4 - 思念如線)

不經不覺, 波波已經離開咗3個月, 心情平復咗好多, 但好多時都會做出一啲無意識嘅動作, 就好似佢仍在.....
例如往日我坐喺電腦檯前, 隔無遠嘅波波就瞓喺我大床, 往常我如果要行一行開, 即使加咗床欄, 我都一定會拎個枕頭放喺缺口位置再擋擋!

戀戀不捨（w/mp4-永不失聯的愛）

到今日, 波波離開我已經兩個月, 但我對乖仔嘅思念並未變淺, 反而越來越渴望可以再見佢一面, 那怕喺夢中相見!
呢個願望一直未能實現, 反而佢嘅聲音, 我彷彿聽過好幾遍.....

紀念抱枕 (w/mp4-如果沒有你)

今日係波波離開滿一個月, 然後又收到阿女送嘅禮物, 一打開又眼涙直飆; 自從波波離開後, 我最發達嘅係淚腺, 眼淚總係流極都流唔完!

我從來無想過要呢種型態嘅抱枕, 所以豆b走後我無要做嘅打算, 可能阿女想比我多啲安慰, 今次真係好似再同乖仔會面, 感覺激動又心酸!

萬物有時 (w/mp4-往後餘生)

波波離開第21日, 表面一切回復正常, 一家人都如常生活, 但無人會喺我面前主動提起波波, 因為所有關於波波嘅周邊, 都會攻陷我防線, 佢哋唔想衝擊我😔.....
我最怕無心理準備下講及波波！

波波離開一星期 (w/mp4-突然好想你)

無見到波波已經有一星期, 仍然好唔習慣, 之前有好多瑣事要安排, 到依家安靜落嚟, 先強烈感受到嗰種失落及椎心之痛啊; 每晚瞓吓醒吓, 一醒就望向波波張床仔, 睇吓佢有無返嚟, 之前豆b走咗, 第三晚就見到佢坐喺自己張床仔, 佢仲返過嚟兩次, 但點解我仲未見到波波?  
好失望, 見唔到乖仔, 但曾經聽到過佢嘅叫聲, 好細聲但頗清晰!

愛心木盒 (w/mp4)

呢段日子以來, 身心都處於繃緊狀態, 照顧波波最後階段時真係好攰, 精神同體力都消耗極大; 到佢離開, 一切静止, 但休息唔到, 即使全身肌肉酸痛精神萎靡, 但每晚都失眠或者祇瞓得好短嘅時間!

空出好多時間, 不停搵嘢做, 搵波波相片做視頻, 做手工, 每分每秒嘅時間都要被occupied!

波波返屋企

 

welcome home, 我嘅9月小天使

今日帶波波返屋企喇, 唔識形容係乜嘢心情, 由早上開始, 心口有巨塊頂住, 頂到喉嚨椗....

琴晚好大雨, 出紅雨警示, 好擔心今日又落大雨, 雖然無大妨礙, 但又要出去買花濕晒身就壞心情; 感恩一覺醒來天氣出奇地好, 係波波你幫媽媽嗎?

加深記憶

一年前嘅波波豬

 
預較喺手機嘅鬧鐘每日仍routine咁響, 提醒我要比波波食藥, 雖然一切已經改變, 波波再唔喺我身邊, 但我唔想將鬧鐘set停; 老公叫我停機好好休息, 但我就係唔想, 每次鬧鐘響我就回想, 回憶當日餵藥嘅情境, 一次又一次喺腦中重複, 加深記憶....

一路有光 (w/mp4-天使的翅膀)

非常非常掛念波波, 屋企變得好靜好靜, 滿眼都係波波用緊嘅物品, 好傷心, 情緒都唔知要點調整; 個心好急, 好想快啲將唔好嘅情緒修正, 因為我要為波波頌經, 即使我一直無信仰, 但知道會幫到波波, 我一定虔誠!

痛別離 (w/album, mp4-Please don't go)

今日, 終於要同波波講再見, 為乖仔唔使再受苦舒一口氣, 但自己心痛超難受, 到咗真係要分別嘅時候, 我真係唔捨得放手....

琴晚好朋友再比我訊息, 話見到道門已開有幾隻松松嚟接佢, 時間係差不多了, 但波波極堅持要留到最後; 朋友叫我唔好全程守住, 順佢意思, 話波波愛我太深, 未必想我睇住佢停止呼吸😭! 

迴光返照

波波氣息已經好弱, 整個上午都係昏睡狀態, 我唔敢再比佢任何食物, 曾睇過一篇報導, 話身體進入彌留狀態, 再比食物係加重佢嘅負擔, 佢會好辛苦, 所以今早祇比一茶羹baby food佢都嘔; 但佢未肯走, 眼巴巴睇住佢餓死嗎? 既然佢話鍾意湯嘅香味, 又試比一茶羹滴雞精放近佢鼻仔比佢聞, 但波波立時伸出脷仔, 好快舔晒！

等待別離時刻

波波對擁有豐厚嘅毛毛自豪, 就將佢最好嘅身段刻入腦吧

琴晚波波食咗baby food, 之後就嘔, 我諗佢一次食太多, 身體難接受...
今早早餐, 我嘗試只比一匙羹, 佢舔晒, 然後即刻就嘔, 為咗要生存陪我更久, 努力堅持唔走, 仍盡力去食, 但堅強嘅意志竟比殘破嘅身體打敗, 勉強進食都係嘔, 我真係崩潰難受, 泣不成聲眼淚狂流!
仔呀你唔好再堅持唔好咁固執, 你要放手!

傳遞訊息 - 傳心術

波波好自豪年輕時有靚靚嘅毛毛

今日波波情況更差, 用針筒餵都唔太肯食, 我已經停晒所有藥物, 唔想再強迫, 唯一keep住滴順勢療劑- transition ease; 陪住喺佢身邊, 流咗眼淚千公升, 心情一緊張, 個肚又唔爭氣, 肚痾咗N次....
點解我總係唔可以將心情調整?

選擇寧養

陪咗波波一個通宵, 佢瞓得好好, 呼吸順暢, 偶然郁吓手腳, 我摸吓佢仲識轉身, 睇落好正常; 但我唔會有雨過天青嘅幻想, 諗起佢大叫全身軟晒時我好驚, 好驚佢辛苦我又唔知要點幫....

捱唔耐喇

those were the day

感覺波波應該捱唔耐喇, 通宵陪喺佢身邊, 叫佢唔好撐, 乖乖去搵豆b玩!
一路講一路把聲震晒, 叫自己唔好喺波波面前喊, 佢知我咁傷心一定會為我硬撐; 但我真係唔想見到佢再大聲叫喊, 雖然唔知佢發生乜事, 但一定係辛苦先會咁嗌!