回憶5寶生平

終於, 親手用陶土做好4隻狗狗, 希望有少少似啦, 我無完全跟足相片做, 相片無我腦中嘅形像咁真實, 因為每個唔同階段嘅狗狗, 都有唔同嘅變化, 我就跟隨自己嘅印象好啦!

媽媽無心肝

真係該死, 又再一次忘記咗叻叻離開嘅日子 :'(
近排魂頭轉向, 比波波嘅病症攪到我無日安寧,  日日忙住為呢隻豬做物理治療, 咁叻叻嘅忌辰, 又過得無聲無息 :(
我唔係唔掛住生活喺彩虹橋上嘅五寶, 相反最近仲請咗一個店家,  好濕碎咁要求佢為我嘅寶貝做一件事!

Miss Me But Let Me Go (精精篇)

今日係精精嘅忌辰, 佢離開咗5年喇; 精精係唯一嘅一隻狗狗, 喺佢離開嘅時候我無陪伴左右; 每次諗起我都感到遺憾 :(

朋友安慰話係精精貼心, 唔想我送佢離開會傷心, 我唯有領受精精呢份心意, 將佢嘅好意銘記於心!

記念安安 -安安篇 (w/album)

相片連結

3隻豬生日會後不足一個月, 又到安安嘅忌辰, 每諗起安安, 都會掠過一陣心痛, 對佢實在有虧欠感!

未養3寶嘅時候, 只得安安一個, 真係萬千寵愛在一身, 接咗3寶番嚟, 關注即刻降溫, 但安安並無怨恨, 係咪性格真係天生?
越諗起安安嘅大方, 就越覺自己難辭其咎, 點解安安可以全無妒忌, 仲每日都笑面迎人?

3年來日子過得好嗎? (樂樂篇)

樂樂, 又一年喇, 你離開咗我哋3年來, 日子過得好嗎?
近日睇到有網友討論你哋離開後, 將骨灰放屋企好唔好, 但從一開始我已經決定咁做, 因為我從來無諗過好定唔好, 變成咗理所當然!
當然有人講好或唔好, 但我覺得但求心之所安, 咁多年來, 你哋去咗彩虹橋嘅5寶, 一直無離開過我, 骨灰全都係放屋企度! 
而我, 從來無覺得唔好, 可能我無宗教信仰, 考慮會較輕鬆啦:)

給BeBe的信！ (BeBe篇)

BeBe,  今日係你嘅忌辰, 離開咗咁耐, 有無掛住爸爸、媽媽, 仲有最鍚你嘅姐姐呀?
記得第一日接你番嚟, 你跑過嚟舔我, 嚇得當時怕狗狗嘅我呱呱大叫, 即刻跳上梳化; 又記起年紀細細嘅阿女即刻走過嚟攬住你, 猛叫唔怕唔怕, 其實你有怕咩? 當時你係頑皮嘅小精怪, 見你哋玩到嘻嘻哈哈,  你仲頑皮咁用細小嘅牙齒輕咬阿女, 怕嘅係媽媽啊!

整整8年長 (叻叻篇)

8年前嘅今日, 叻叻離開咗我!
叻叻嘅離開仲好似一場夢, 好唔真實; 關於佢嘅每件事都仲歷歷在目, 影像深刻; 不過即使感覺再真, 但一切都已經再觸不得, 碰不到!

我會想念你 (安安篇 w/ mp4-我會想念你 )

今日安安離開咗足3年喇, 仲記得好清楚佢走嗰日, 我捉住佢雙手, 輕掃佢背脊嘅毛毛,  一路同佢講放心走啦, 唔好唔捨得我哋, 攰喇要休息喇!
阿女早一晚有同佢道別, 嗰日我同老公都有陪喺佢身邊, 輕輕同佢講, 唔好再堅持, 一路好走!

百年之後 (叻叻篇 w/mp4 一路好走)

一年嘅時間一晃眼就過咗, 轉眼又到咗叻叻嘅忌辰, 咁就過咗7年喇; 仲記得舊年忘記咗今日, 今年我點會再錯過?
但其實懷念叻叻, 又豈止於今日呢? 不過一般人都會於當日作個悼念, 係一種紀念, 係習慣落嚟嘅傳統精神!

精精離開我有三年喇! (精精篇)

近來差不多每一個月都寫一篇悼文, 去懷念我過咗身嘅狗狗, 6月叻叻, 8月bebe同樂樂, 9月係安安, 10月嘅今日就係精精第3年嘅忌辰!

我真係好怕回想番呢D過去!
我每次想起精精, 我都覺得心中有愧, 佢係唯一嘅一隻狗狗, 選擇咗深宵中獨自離開! 

安安, 咁快就過咗兩年喇! (安安篇)

咁多隻離開咗我嘅狗狗當中, 我對安安最感歉咎, 從我帶咗3寶番嚟之後, 明顯對佢少咗關心, 以前得佢一隻嘅時候, 佢曾經係萬千寵愛在一身......

做人就係咁, 永遠都有追悔, 喺當時嘅環境, 永遠唔會睇番轉頭!
我記得有一次, 我同波波影緊相, 安安走咗埋嚟, 當時我順手就推開佢, 叫佢唔好阻住; 但我無諗到安安已經年老, 我咁一推, 佢會跌低; 當時阿女即刻話我, 佢話你推跌咗安安喇, 快D安撫番佢呀!

原來樂樂無離開過...(樂樂篇)

今日係樂樂嘅忌辰, 轉眼又一年喇, 上網睇到有寵物安樂園嘅工作講，動物嘅靈魂會停留喺骨灰上3年，3年後就會離去，唔知係唔係真嘅呢? 如果真係咁樣, 樂樂你無離開過我哋,  仲一直喺屋企陪住媽媽 :)

5寶軼事



生活喺彩虹橋上嘅４隻寶貝！

如果唔係朋友A提起佢以前嘅yahoo blog, 我都唔記得咗, 原來我都有一個!

不過都係多年前嘅事, 嗰時係剛剛精精去世, 我寫咗3篇文章咁大把:) , 用嚟抒發一下有D失落嘅情懷!

今日searched番, copied埋落嚟呢度, 睇番都頗有感受, 嗰時安安同樂樂都未走!

都係自己寫嘅嘢, 為咗整理方便D, 都係grouped埋一齊啦！

悼bebe (BeBe篇)

一個人嘅心要有幾廣闊, 先可以裝載到咁多悲歡離合?

八月 - bebe同樂樂都選擇咗呢個月份離開!!

生離感傷, 死別錐心, 從過去到依家, 每發生一次就重傷一
次; 從來唔可以睇得開, 睇得化, 只可以將嗰種痛沉澱落嚟, 唔去想, 唔觸碰.....

遺忘咗叻叻嘅忌辰 (叻叻篇)

偶然睇吓日曆, 驚覺今日已經係6月12日喇, 我係唔係病懵咗呀, 竟然忘記咗6月7日, 係寶貝仔叻叻嘅忌辰; 佢離開咗我, 足足有6年喇!

轉眼就六年, 坐低細想, 回味住同佢相處嘅每一個生活片段, 忽然一下子，重現眼前,  諗起初初接佢番嚟, 就好似只係上星期發生嘅事一樣，感覺好近... 但捉不到，留不住...... 
我越去細想, 越心有慼慼然! 作為佢嘅媽媽，只能默默承受... 過多嘅眼淚，只會令佢走得不安...

狗狗嘅前世今生 (樂樂篇)

去年影既相, 樂樂15歲高齡都仲好靚女

一轉眼間樂樂已經走咗四日, 我嘅心情亦都平伏落嚟! 

三隻豬仔若無其事, 好似完全唔察覺屋企少咗個伴!
或者樂樂一向同佢哋都唔親厚啦!

其實樂樂已經唔開心咗好多年, 近月心情仲差, 可能佢感覺到自己已經企起身都有困難, 所以佢好憎恨自己雙手吧; 後期常見佢好用力咁咬扯自己對手嘅毛毛, D毛毛都差唔多比佢咬甩晒!

每次見佢咁樣我個心都好唔舒服, 抱起嚟問佢係咪好唔鍾意呢雙手呢? 我同佢講唔緊要啦, 媽媽會幫你啦, 我都有同佢每晚做吓按摩, 不過都對佢幫助唔大!

帶樂樂回家 (樂樂篇)

今日, 係另一個難忘嘅日子!
喺約定嘅時間, 我哋提早到咗寵物善終公司. 一如以往, 佢哋會將狗狗放喺一個藤籃, 帶到悼念室, 比我哋再聚片刻.
此後, 我哋就永遠再唔會見到樂樂喇!

送比樂樂嘅彩虹球 (樂樂篇)

爸爸親手為樂樂做嘅彩虹球,手工粗糙,但載滿濃濃嘅愛

年輕時嘅樂樂好鍾意玩波, 自從佢行動不便後, 佢已經無能力再追住個波跑喇; 喺佢面前, 我甚至唔敢比佢睇到個波!


昨日佢離開咗屋企後, 我就諗起要買個波比佢, 等佢喺彩虹橋又可以自由自在咁, 喺草原上追住個波, 自由奔放咁跑個痛快!
我記起叻叻離開嘅時侯, 我帶比佢嘅野, 有唔可以入爐嘅, 所以, 今次我希望可以搵到一D物料, 係可以比樂樂帶住喺身邊!

送別樂樂 - 樂樂篇 (w/album)

Dec 10, 1995 - Aug 25, 2011
相片連結

樂樂走咗喇! 於2011年8月25日, 中午12點52分!
今早6點開始, 我就將佢放喺我身邊, 我知道今次唔會等好耐喇!

我同佢講, 叫佢唔駛驚, 媽媽喺度陪住佢, 快D瞓覺啦, 瞓醒就會見到叻叻架喇!

我睇住佢呼吸續漸急速, 然後 - 睇住佢嚥下最後一口氣!

從此, 佢唔駛再受苦喇!!

虛弱嘅樂樂 (樂樂篇)

年輕時嬌俏嘅樂樂

今日抱起樂樂同佢清潔嘅時候, 發覺佢好輕!  佢依家已經食少咗好多, 由乾糧轉咗乾糧+罐頭, 再由淨罐頭轉食嬰兒菜, 佢胃口明顯轉壞, 但還好仍肯堅持進食.