大年初一 (w/ video)

大年初一, 3隻豬仔恭祝大家萬事如意, 身體健康!

一連4日工人姐姐放假, 我同3隻豬要好好珍惜呢幾日寧靜嘅日子, 我就好享受呢幾日唔使激氣:)

講出嚟都好笑, 點解咁唔鍾意都要留住佢, 事實上無咗姐姐幫手真係好踢腳, 況且佢人係蠢D, 但人品都唔差, 一年來都未有駁嘴; 所以我激氣都唔會針對個人, 只係針對件事!

年三十晚 (w/album)

相片連結

年三十晚, 今年忙得特別慘, 一早起身服侍三隻豬已成為習慣, 但直落無得再瞓番, 仲要應付咁多雜務我好唔慣 :(
餵完達達第一節藥有好短暫空檔時間,  即刻落超市買材料準備今夜晚飯後煮齋, 呢個餸我由細食到大,  唔想免除呢個習慣; 依家過時過節已經盡量簡化, 但想保留番少少傳統啦!

Grooming a Pomeranian - 轉貼

唔知點解睇呢段片我好肉赤,  隻松松真係好乖, 左舞右舞都咁合作!
我覺得梳毛好似有D拉扯, 又覺隻松松好攰企咁耐, 我真係唔捨得咁對我3隻豬, 係咪我太偏愛, 係我變態, 還是大家都有呢個感覺 :)

媽媽好煩 （w/album）

相片連結

忙忙忙, 呢幾日真係忙到甩肶, 可能咁先夠意思, 記得以前我媽媽話過時過節要熱熱鬧鬧, 佢最鍾意過節逛街市喇!

香港人係咪真係壓力太大, 分分鐘都想打交, 前兩日我出街, 人又逼真係好得人怕; 話說企我前面嘅一位叔叔, 佢突然轉身行, 一脚踏落我腳面, 我本能就用手去格, 我怕佢收唔住勢會再撞過嚟啦; 呢位阿叔即刻聲大大, 瞪大對眼問我推咩推喎, 我話你已經踏到我, 我當然本能保護自己啦; 呢個阿叔一定係惡人谷長大, 如果佢唔係見我係女性, 我諗佢會打交, 依家D人真係燥火得可怕!

心甘情願 （w/album）

相片連結

達達用順勢治療有一星期喇, 所有藥我都已經grouped埋咗一齊比佢食, 今次共有4款藥,  但要分隔開時間真係要周詳咁部處; 本來Mi話可以同一時間一齊食, 但我網上搵到嘅資料話想效果良好,  每一隻唔同嘅藥最好分隔開半小時, 咁既然係用, 梗係做到最完美啦! 

D藥要每日食4次, 仲要同早午晚3餐分隔開D, 達達要食甲狀腺藥, back and joints supplement, 仲有魚油同immune boost, 又要將時間再拉開多D. 

天佑我也

偶然搵到一個外國嘅網站, 係講述狗狗椎間盤病變問題, 資料詳細!
無論係手術治療還是保守治療, 都列出好多要點, 有關一般會比咩藥物, 有咩保充品可能幫到呢個病, 術後運動等等, 全部都有得睇; 當然各家長都要過濾吓內容, 唔係一面倒咁信晒,  如果狗狗有呢個病,  我好推荐呢個網站, 可以抽取你認為有幫助嘅內容同醫生商量!

文中有幾點, 其中一點我覺得好sad, 咁即係波波同達達永遠都唔可以好似以前咁玩摔角喇 :(

分身不下

 
呢3隻豬真係就快將我玩死, 挨年近晚總係多多事, 琴日又輪到豆b喇!
琴晚見豆b成晚將個下身磨地下, 一般咁情況會首先考慮係肛門腺問題, 但我剛同佢放咗之嘛, 用手摸過都唔覺佢有脹嘅感覺, 應該唔係呢個問題啦, 不過我都嘗試再幫佢放多一次, 但係一如所料並唔關事啦!

新"玩"具

達達食順勢嘅藥後無見到有不良反應, 咁我就當佢受落, 較為放心啦, 最壞打算係D藥同佢唔夾, 幫唔到佢; 其次係D藥唔可以令佢好番, 但可以幫到佢keep住目前狀態, 起碼無變壞; 最理想當然係目前症狀有進步空間啦, 不過要比D時間!
 
上動物順勢療法嘅網站, 睇咗好多狗狗服藥後, 狗主嘅正面回應, 比我多咗信心, 雖然人哋嘅狗狗適合並唔等如適合達達, 但要做嘅都做咗, 希望在人間啦, 萬望達達豬唔好惡化呀!

順勢治療 Homeopathic Treatment

今日開始幫達達試用順勢治療, 有D緊張!
星期一開始已經停晒一切輔助療法, 就試一個為期4週嘅順勢療程啦!
雖然順勢醫生幫達達配幾種藥, 為安全計, 都係一樣一樣咁試用,  食後有咩唔對, 都知道quit邊種啦, 好似穩陣D :)
之後無問題就可以組合埋一齊喇!

達達第8次針灸

呢個樣好似好開心㗎

兩個月落嚟達達共做咗8次針灸,  原本諗住做到月尾, 都過年啦, 就會歇一歇, 跟住用順勢治療!
 
一直以來達達做針灸都好合作, 不過今日過程中唔知出咗咩問題?  
前半段時間都ok, 後尾針到腳仔, 佢就猛掙扎猛叫, 仲成身震晒, 好唔like!
我最肉赤聽呢D尖叫聲, 決定早少少比佢休息吓, 下星期唔去喇!

試用酵素精華 (w/album)

相片連結

琴日拎咗Mi比達豬試用嘅酵素精華, 今日急不及待同佢試吓, 本來工人姐姐放假, 同達達沖涼要自己做晒事前準備, 同事後善後嘅工作, 唔係好化算㗎, 哈哈！
但我呢D咁心急嘅性格,要做嘅就一日都等唔到啦; 何況聽日去針灸後, 又要等兩日先好沖涼, 望住枝精華素, 你叫我點等咁多日吖!

攀山運動 (w/album)

相片連結

今日天氣好似無咁凍, 對twins唔再整日縮喺被竇, 有興趣郁動喇; 波波當然鍾情達達, 成日撩佢玩, 但達豬剛做完艾炙, 好想瞓覺; 豆b睇準機會過嚟撩波波, 喺咁情況下波波只好相就吓.
幸好有豆b陪吓細佬,波波都可以發洩吓啦!

除舊迎新

星期一達達做完針灸後, 觀察咗幾日無發覺有新進展, 似乎已進入咗一個平台期, 唔上唔落喇; 可能針灸只可以幫到呢步, 決定新年後開始嘗試順勢療法, 睇睇情況再決定下一步條路要點行; 可能將針灸納入保健, 定期去針吓, 疏通下經絡加強吓血液循環咁啦, 要改善達達腳震嘅問題, 針灸效力唔大!

達達第7次針灸 (w/album)

相片連結

唔經唔覺帶達達做咗7次針灸喇, 因為上次改變咗落針嘅位置, 情況有改善, 當然跟住呢條路走啦, 繼續雙經絡下針喇!

針灸呢段期間, 無論佢嘅情況係點, 我嘅心情都上落頗大, 咁當然係佢嘅病狀牽動我嘅情緒啦!

甲狀腺報告麻麻

臨走前影張相, 心情靚番晒

今朝要一早6點幾起身, 服侍3隻豬食早餐食藥, 因為今日要驗血; 驗甲狀腺素要食藥後4-6個鐘, 咁都無咩時間選擇喇, 7點食早餐然後11點左右驗血, 仲要等報告嘛; 要就住診所午飯時間, 最怕阻住人哋收工!
琴晚唔敢夜瞓喇, 雖然叫我早瞓真係無可能,  尤其係心情都係有不安, 最怕聽報告!

再展歡顏 (w/album)

相片連結

今日同達達豬沖涼, 因為明日又係3隻豬驗血時間, 跟住星期一又去做針灸, 之後又要休息幾日, 今日唔洗白白會delayed好多日啦!
明日佢哋嘅甲狀腺驗血報告, 希望一如以往控制得咁好!

午間小敘 (w/album)

相片連結

好耐無doggie date, 無同朋友V嘅狗狗一齊玩喇, 亦都好耐無見過朋友V, 呢段時間大家各有各忙!

但願問題快D解決 (w/album)

相片連結

達達琴日轉咗姿勢兩條經絡一齊針,  好似係有好轉, 不過佢時好時壞, 我都唔敢太快開心; 上次明明有兩日無脚震, 但後來又差番, 今次要比多少少時間再睇睇!

下面條片可以睇到達達嘅改善, 比較行得有力喇(我要放個屋仔擋住, 怕咗達達衝入房呀), 咁即使我已經訂咗順勢療法嘅藥番嚟, 都係hold住先; 椎間盤問題算係慢性病, 有咗呢D藥傍身感覺會較安全!

第6次針灸治療 (w/album)

個傻妹係咪唔知要針針呢, 咁開心！
相片連結

今日係達達第6次針灸治療,醫生再同達達檢查清楚, 連心肺都聽埋喎, 都係反射神經正常晒, 至於下盤無力同腳震, 就似乎改善唔大, 咁究竟點解?
醫生話今日一於改變姿態, 兩條經絡一齊針, 但都係把握唔大, 因為呢位公主唔易攪, 如果達達奮力反抗, 咁就無得硬來喇! 
達達初見醫生時張牙舞爪, 醫生見佢反應咁大, 覺得無可能用到呢個姿勢, 都一直用側身輕壓, 但5次後反應唔太理想啦, 一於試試改變策略, 希望達達合作啦!

星期日做阿四 (w/album)

相片連結

星期日唔會出去, 雖然天氣好好, 但咁情況出面一定超多狗狗, 二來每個星期日我都要做阿四, 進行大掃除!

每個星期日工人姐姐放咗假, 我就會入佢房打掃, 有垃圾要幫佢清除; D姐姐有時會嚇死你, 食完零食嘅吉包就咁放喺床上, 唔會跟手掉咗佢啦;  如果諗住有個姐姐就可以放手咩都唔使理, 呢個CONCEPT已經不合時宜, 今時今日有個姐姐, 唔自己跟住隨時激死自己!

TTouch

沖完涼被困唔開心啦

今日同達達豬沖涼,將部SPA機放落低D嘅位, 因為發覺D水顏色唔太奶白, 唔知係咩問題; Mi話佢就放到好低, 每次都好白喎, 咁我都試吓啦; 但效果都係出唔到嚟, 都只係似洗米水咋, 咁即係唔關之前我放嘅位置關係, 而且上次同豆b沖涼, 係名乎其實嘅milky spa嘛!

Happy New Year 2014

又係新嘅一年, 祝願所有煩惱事隨2013年過去, 好人好事好健康跟2014年到來!
其實我從來都唔貪心, 每年都只係許同一個願望, 只願大家都身體健康!

今日工人姐姐放假, 屋企即刻寧靜好多, 我開住音樂好享受喎; 如常同達達做艾炙, 佢都係 一路做放鬆到瞓咗 :)