2018年8月, 訂做咗客制真皮鎖匙扣, 當然係寶貝仔波波啦, 當時祇先做一個, 因為未知效果係點, 兩個女就押後; 痴痴地等咗近半年, 今年1月終於收到成品, 效果喜出望外, 完全做到波波嘅神韻, 我呢個心急人即刻同店主聯絡, 要做埋達達同豬豆!
好失望店主回覆話師傅要煞停, 要先完成手上堆積如山手嘅訂單, 叫我等候....
上次付款後都等近半年, 依家連比錢嘅機會都未有, 等.... 等到幾時機會先再有?
3隻豬, 欠缺任何一隻個心都唔好受, 豆b嘅離開我無力挽留, 但做個鎖匙扣.....
我好希望豆b返來, 齊齊整整3隻豬仔再捧在手嘛!
我希望師傅比我進入waiting list, 完成之前嘅訂單就直接幫我加油, 而唔係漫無目標咁等候; 同店主傾談, 請佢代我向師傅說明情況, 好幸運師傅破例接埋我張單, 免除我患得患失嘅守候!
今次等待嘅時間更漫長, 但有得等已經好感恩, 我從來唔敢催促唔敢問, 店主話我係好客人😊!
大概一個月前, A突然同我講網上見到豬豆鎖匙扣, 我係完全唔知, 點解今次我資訊咁九流😅!
即上網去睇, 原來仲未係成品, 但師傅覺得豆b可愛, 特別發訊息比店主, 我可以搶先去睇吓真幸運!
幾日後, 店主又上片, 話師傅特別喜歡呢個制成品😍!
豆b真係親善大使, 即使已離開, 感染力仍在, 佢係有種親和力, 得到他人歡心!
今日, 收到豆b達達嘅匙扣喇, 豆b做得真係好靚, 實物可以見到精緻雕刻嘅凹凸紋, 達達嘛, 我感覺稍遜一籌喇; 唔知點解, 上次做浮雕感覺都係一樣, 波波豆豆都係做得好靚, 達達真係好難做到公主嘅獨特氣質!
不過, 手功呢家真係無準則, 靚同唔靚感覺好個人, 如果想做到同相片一模一樣根本無可能, 又唔係影印😜; 手工呢樣嘢我祗求做到相似度有7分, 見到佢知道係邊個已經好了不得👍!
其實, 我仲排緊做3隻豬嘅黏土公仔, 台灣呢家排期要兩年半後, 但祇要做得像真度高, 就值得我去等!
呢家手工製作要求頗認真, 經溝通後就令我更有信心!
後記: 真係每個人審美眼光有唔同, 有不同嘅觀點與角度, 正當大部份人都覺得豆b做得好靚, 阿女睇法有唔同!
佢最鍾意波波, 完全做到波波細個時嗰種蠱蠱惑惑, 得得戚戚嘅表情同自信!
達達都好得意, 瞪大眼仔下一秒就會鬧人, 都好有佢獨特嘅表情性格!
祇有豆b, 係做得好靚, 但無咗佢嗰種古靈精怪, 無咗豆b獨有嘅精靈, 代入咗太溫純嘅表情, 做唔到豆b嘅神韻; 阿女比豆b呢個匙扣, 最低排名😲!
唔知睇咗呢個blog有一段時間嘅大家, 對豆b有嘅認識, 又會有咩唔同睇法同認定😊?
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
