原來心情唔好時會有咁極端差別, 我一向做法會寫文章抒發, 但今次好相反, 完全集中唔到, 無辦法將所想表達, 一時滿腦畫面, 轉瞬空白一片!
寫blog以來, 從未試過咁耐無更新內容, 思緒如亂線般纏結!
2020年, 國語諧音'愛你愛你', 咁美麗嘅一年, 曾經祈盼今年唔好咁亂, 一切要有好轉, 點知所見所遇嘅都係咁負面....
先係冠狀病毒感染, 搞到人心惶惶, 除咗口罩缺貨引起搶購熱, 主要不單止清潔消毒用品, 見到D人連糧油廁紙係咁瘋狂掃貨, 好似打仗咁亂; 而我有另一concern, 聽聞萬一要隔離, 家中貓狗要交比漁護處檢疫, 如果係真嘅我兩隻豬都應該小命難保, 無得返出嚟喇😭, 除咗我有邊個如我般適心照料!
擔心都無補於事, 唯有盡量小心, 希望疫症好快受控制唔會蔓延!
一浪接一浪咁衝擊香港, 呢粒東方之珠仲會唔會再發光發熱?
然後, 朋友狗狗選擇咗一個特別嘅日子離別, 20200202呢個日子為朋友帶來重創, 雖然安慰在狗狗已脫離苦海, 但相依相伴嘅日子已一去不復來, 呢個噩耗令我又想起自己已離開嘅毛孩, 情緒低落!
最傷感嘅係我一個好朋友離世, 大家相識於少年時代, 親密陪伴走過人生每個階段, 從青春期時分享小秘密, 咁多年一直彼此信任, 任何事會義無反顧幫忙; 佢突然離開, 過去嘅點滴每日都浮現喺腦海, 呢種傷心好難走出來...
唔可以形容自己每日以淚洗面, 但每每諗起過去, 落淚係必然!
新嘅一年, 無遇到一件開心事, 兩隻豬身體穩定下滑, 達達後腳開始無咩力, 每次VV急轉時都會跌; 波波嘛, 唔覺佢有痛嘅表現, 但時有嚶嚶咁叫, 抱又唔啱拖住行又唔要, 脾氣暴躁我唔知佢想點!
兩隻豬無明顯症狀, 如常飲食大小便, 瞓覺都自然, 咁係年紀老大嘅徵狀顯現? 我可以點?
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
