2020年1月25日星期六

鼠年吉祥

鼠年大年初一, 波波達達同大家拜年, 祝願大家身體健康, 出入平安!

阿女早排出差, 碰啱時間喺機上買咗兩隻生肖鼠返來比我, 咁我又搬埋其他生肖公仔出來影吓相, 依家都無好大興趣影過節相喇; 連落樓下取景都懶, 自己影幾張都盡量簡單, 唔同以前搞咁多道具佈景啦!

一來係對過節有D意興闌珊, 二來要兩隻豬集中好難, 波波睇唔到focus當然有困難, 隻惡女達達超唔合作啦, 想移好少少位置都比佢大聲閙😂!
只可以等, 等佢哋自然配合, 見差不多就速按下快門, 唔好講到構圖咁複雜喇!
朋友問點解無影達達正面, 就比大家睇吓佢有幾惡死啦!

時間真係過得快, 波波陪喺我身邊過咗13個新年, 而達豬跟我都有12個新年喇, 兩隻豬仔從鬼靈精怪好似粒濕水欖核咁兩頭竄, 一眨眼已年紀老大, 依家大部份時間都係瞓覺!

不過肯食又瞓到, 作息正常都好感恩喇, 歷年來養咗咁多隻豬, 都明白亦經歷過, 日子未必可以過得簡單平凡, 日常嘅生活都會突然變得有困難!
就如波波已經眼盲腳仔又退化, 達達聽覺都變差, 好似撞聾咁對聲音反應無咁敏感喇!
新年都無咩特別願望, 祗願兩隻豬仔平平安安, 穩定過日子就心滿意足啦!