仍然努力照顧兩隻豬仔, 不過身體上有D疲累, 應該係瞓得唔好嘅關係!
波波身體狀況比之前差咗, 以前臨瞓前比佢去咗VV, 佢係可以一覺瞓到天光, 依家就半夜一定要比佢去尿尿, 如果我瞓著咗無及時幫忙, 佢忍唔到就會尿床, 應該係腎功能衰退嘅結果!
咁情況床墊被鋪濕曬唔在講, 最肉赤係個仔搞到一身尿味, 毛毛濕晒又凍凍嘛!
床鋪被褥必然要盡洗, 但無可避免每次都要同佢沖涼, 密密沖涼對佢係一種壓力, 睇唔到嘢浸落水佢會緊張; 曾經嘗試晚上睡前包尿片為解決方案, 係可以解決到以上問題, 但又有另一concern!
雖然只係晚間睡前短短幾小時包尿片, 亦已再另加隔尿紙, 以防佢肚仔濕咗焗住會出皮膚病, 但佢皮膚實在太敏感, 見佢都係出晒紅點我好肉赤!
不得不放棄呢個方案, 我寧願自己中斷睡眠, 每晚起身兩次抱佢去VV, 呢個做法更恰當; 還好我將佢叫醒, 佢解決完可以即時瞓返, 無做成佢太大影響!
咁做可以解決到床鋪唔濕個仔又唔怕有皮膚病, 只係我醒咗後通常都唔可以再瞓到, 每晚都眼光光等天光!
還好我唔使返工, 日間可以偷到時間小睡片刻, 不過仍感覺精神疲累茫茫然, 補眠同正常睡眠都係有分別!
雖然精神體力上都多咗負擔, 但心靈上反而可以解脫, 我無再好似以前咁諗到好負面, 解決到問題會感覺釋然!
自問可以做嘅我都已經盡量做好, 比心機將佢哋好好照顧, 我從無諗到波波會因膝蓋結構性問題而行唔到, 我過去不停努力筋骨保養都係避唔到...
如果呢個係佢嘅命, 我祇希望仲可以幫到佢唔會痛, 仲可以利用拖帶幫佢做到適量步行運動!
波波已經唔可以自行企喺度, 膝關節移位日益嚴重, 佢要就住膝蓋骨腳仔會彎曲, 如果無support佢後腳根本好難有正常力度; 還好我每日都會幫佢按摩再帶佢步行做少少運動, 佢大腿仍有肌肉!
以前R哥哥就講過有D狗狗係退化到皮包骨, 大腿好似紙咁薄摸落好肉痛, 希望在我努力下波波唔會咁受苦, 我會盡力幫佢喺不良條件下活到最好!
達達應該都比以前退步, 佢瞓嘅時間多咗, 不過喺特定時間仍精力十足!
佢哋身上真係帶有個時鐘, 每日臨近老公放工公主就開始嘈, 一直到老公返嚟, 同佢排排坐先會安靜唔再躁動; 晚上入房瞓覺都會做同一舉動, 要齊人入房先放鬆, 我諗佢腦退化又唔似太嚴重, 感覺呢方面仲有咗進步; 除咗瞓多咗, 後腳力度弱咗, 其他算穏定我已好知足!
我已經學習放下自在, 唔想再為愛佢哋而做心靈嘅囚徒, 我接受佢哋身體機能嘅退步, 亦無怨無悔繼續努力去做; 唔再為未知而過度擔心, 依家有更深領悟, 唔再去諗仲可以行幾遠嘅路，如果死亡要來, 好多時係意外到根本唔會預先有警告!
更珍惜每日仍可為佢哋服務, 祇要無遺憾就好!
 |
| 一對睡寶寶 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
