一個新冠病毒肺炎, 最終導致全球無一日安寧, 每日從不同渠道都聽到新增病例人數, 點會心情好? 最後實行鴕鳥政策, 避開唔想再聽有關報導!
但壞心情點都係避唔到, 之前低落嘅情緒都未回氣, 兩隻豬仔近日情況又唔太好!
達達一直以來胃口都唔多好, 反反覆覆時好時壞, 已經維持咗好長一段時間, 但還好其他算托賴; 不過近日又變返個乞嗤寶寶, 晚間都瞓得唔好; 琴晚感覺佢有鼻塞呼吸唔到, 希望用多幾日liposomol C + Manuka honey, 會一如以往咁幫得到啦!
波波之前一直情況穩定, 身體狀況算係幾好, 除咗睇唔到行唔好, 其他大致上算正常; 一直都覺得佢比達達表現更好, 但近日突然開始胃口反常, 脾氣更變得暴躁, 一直以來極黐我嘅波波, 竟然唔要我抱...
每日開餐變得唔熱衷, 菜蓉要用針筒手餵, 佢自己祇肯食肉 ...
呢個經歷我當然深刻入晒腦, 我亦預咗總要一步步走同樣嘅路, 但...呢個時間要來了嗎? 咁急速嘅改變令我有D手足無措!
當日豆b堅持咗八個月, 今日波波祇係偶然胃口唔好? 還是要開始行家姐相同嘅路?
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
