為達達訂購嘅草本便秘supplement已經收到, 都已經食咗幾日, 無好大改善, 當然我唔會心急; 好明白咩叫補充品, 要比時間等身體慢慢接受, 當然唔同去食瀉藥, 快速見效能!
今日, 見到達達嘅poo poo有D改變, 之前 3日一次無可避免較乾硬欠水份, 但今日見到佢嘅便便質感好正常, 希望係好嘅開始, 無論有幾多幾少嘅改善, 有進步就係幸運!
https://www.petwellbeing.com/products/maris-for-felines
波波情況依舊, 早兩日又令我好擔心, 突然見佢條脷仔喺口腔內打滾, 好似擺放唔到正常位置係咁向外伸, 我個心即刻一沉!
腦裡面即刻浮現叻叻腎病後期嘅畫面, 會有oral ulcer脷仔潰爛, 唔通咁快就差到咁??
即刻檢查佢口腔, 無發覺任何傷口, 再三檢查下發覺原來少咗一隻牙...
原來佢甩咗隻牙仔唔習慣吧, 今日已經正常返!
同A閒談, 佢話我已經湊過咁多毛孩, 理應咩風浪都見慣, 但現實就係咁慘, 無論你幾有經驗, 只要當下係命中你心最弱嘅一環, 要理性面對都係難!
兩隻豬仔無好大麻煩, 一如平常朝住生命軌跡去行, 只要無突如其來嘅變化, 慢慢咁落坡我頂到㗎; 可惜人生路上, 太多相聚與離别都不在我哋預料之間!
有人話生命嘅長度唔在於你擁有幾多日子, 而在於你記住幾多日子, 但唔係口講咁簡單啦!
人生其實好殘酷, 無非係一個不斷喪失嘅過程, 你嘅體能, 希望, 理想, 信念; 或是你最愛嘅人, 好珍貴嘅物件, 都會隨住時間一個接一個從你身邊滑過!
年紀越大經歷越多, 清楚感受到好多嘢你係可以想得通, 亦能夠接受, 但都係會難過!
近來愛上聽歌, 一首好好聽嘅歌, 同大家分享!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
