真係好多謝咁多位朋友關心兩隻豬仔, 喺我無更新個blog嘅呢段日子,陸續收到多位朋友whatsapp問候, 即使平日唔多聯絡嘅朋友, 都突然問起兩隻豬; 可能一直以來, 佢哋都係習慣默默從互聯網上讀取有關訊息, 就知道佢哋有無事!
好感動各位朋友默默關心, 今日做個update, 雖然要講乜我自己都唔知!
如果唔出意外, 生命都從正常軌道循環咁行吧, 雖然會有不同快慢; 兩隻豬仔都喺軌道上朝住終點慢慢行, 無人可以估計佢哋行完呢段路程要幾多時間, 但我已經好明白, 已經喺內心開始建設堤壩, 希望到時唔會太災情氾濫!
達達情況尚好, 祇要佢無病發; 可能春天來到吧, 甚至見到佢毛髮又有改進, 開始豐厚啦!
其他胃口表現如常, 唔好、但唔算太差, 手餵肯食晒; 但腸胃都係差, 仍然係三日一次poo poo, 無晒辦法!
最不幸係佢有一隻眼, 莫明其妙突然晶體移位, 已經睇唔到喇, 幸好仲有一隻正常嘅眼, 希望可以維持到起碼視力, 直到最後啦!
好無奈, 呢D退化, 突變話來就來, 幾小心都係假!
波波嘛, 急速退化...
曾經佢係3隻豬仔中狀態最好, 但自從失去視力, 對細膽嘅佢已經係重力一擊, 到後來膝蓋移位失去埋步行能力, 我諗佢都差不多失去生存嘅動力喇!
到今日, 佢大多數時間都選擇瞓覺, 雖然每日都有大小便, 餵佢都會食, 但生存對佢好似再無吸引力...
輪椅固然唔肯坐, 就算我用拖帶佢都唔太肯行, 同佢按摩會尖叫, 脾氣變差, 我已經搵唔到以前神態囂囂嘅波波豬, 感覺束手無策!
作為媽媽嘅我, 到今日連心痛, 無奈嘅心情都無力表達, 除咗加倍去愛, 留意住佢每個舉動作出適當幫助, 及時反應, 再無能為力!
每個深夜都要起身兩次, 抱佢去尿尿, 唔可以包片片, 呢個仔著衫都抗拒, 包片真係攞佢命, 喺呢個佢有需要嘅時間, 我寧願犧牲自己睡眠， 但求佢可以舒服D啦; 我一直強調生活質素, 但到今日, 我感覺佢失去喇!
There is a difference between being alive and living.
Life is not breathing, life is activity.
我每日作息時間步伐都亂晒, 唔夠瞓精神麻麻, 呆呆咁唔想同人傾談, 不在狀態嘛; 但相比起心理質素, 應該更差吧!
細個時覺得有病好慘, 辛苦嘛, 但原來睇住你嘅摯愛, 去到藥物都幫助唔大, 好似一枝正燃燒嘅蠟燭, 望住燭淚慢慢滴落, 而自己咩都幫唔到, 只可眼睜睜凝望, 等待住蠟炬成灰盡失光芒, 呢種煎熬點用口講? 真係寕願自己病啦！
無論日後有乜嘢變異, 我都一定會好好守護佢哋, 祇要活着有兩隻豬, 我都感激上天赋予我使命嘅恩赐!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
