已經無比波波整日吸氧, 晚間瞓覺時亦只喺最初段時間, 作為輔助補給比佢吸兩個鐘, 之後等佢瞓著後我就關機, 咁佢都可以一覺瞓到天光喇; 不過波波有好大心理壓力, 總係唔願離開個氧氣箱!
我見佢好得七七八八, 嘗試日常作息恢復正常, 晚上放返佢落網床, 但佢會不停嘤嚶叫, 好長氣咁細細聲; 唯有放返佢入氧氣箱, 比佢吸一陣氧, 咁佢就好快安心瞓著！
應該喺佢記憶裡面, 記住逗留喺箱裡面係可以救命, 即使佢唔識咩係生死, 但就真實咁體驗過留喺個箱, 可以改善呼吸困難, 咩都唔使多講！
對於氧療我真係唔識, 完全無經驗, 網上亦祇係搵到好少人用嘅資料, 見到話過度吸氧, 會氧中毒, 肺不張, 呼吸抑制等等好嚇人嘅篇章!
我唔知人同動物有無差別, 但的確要謹慎, 我有問過獸醫意見, 波波氣管狹窄, 作為補養可以吸短時間, 但未去到嚴重徵狀時, 未係咁必要長時間吸氧！
我曾經歷過真係好可怕嘅階段, 無可能睇住佢喘, 係喘咳到好似快要歸天...
從朋友有過嘅經驗, 呢種情況一般去24小時獸醫院, 對於呼吸困難問題一定係先做氧療; 喺未經過任何診斷都係先放氧氣箱, 起碼緩解呼吸困難最必要!
我一定唔會放波波獨留醫院, 依家知道佢氣管收窄情況可以喘咳得咁緊要, 屋企預備好氧氣實在太緊要！
對於自己唔認識嘅醫療, 實在唔敢恣意額外供氧, 最驚愛變成害, 唯有因應個仔嘅徵狀做指標; 見佢好不安發出異常嘅叫聲, 或者脷仔變色, 就比佢吸氧, 到目前為止咁做都見到成績, 希望佢情況可以持續改善！
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
