波波正穩定康復中, 其實我唔太敢用穩定呢個詞去形容, 反正無論人或動物, 年紀老大健康情況都可以突然好反覆, 器官機能衰退係不爭嘅事實, 但佢咁叻仔跨過呢步, 我就要更好照顧, 保養佢病後嘅身體得以康復！
呢個仔身體對西藥極排斥, 幾乎每次用西藥後都會影嚮佢肝酵素升高, 但有時兩者取其優, 當下病情有需要就唔輪到話一刀切say no, 但作為修復保養, 我可以仍用順勢療劑同中藥作維護！
波波除咗用順勢療法, 一直都有用補腎中藥, 今次血檢認証咗我行嘅路, 雖然報告唔係100%完美, 但醫生拎住份報告都笑話佢仲有排老; 當然大家都只係當笑話講, 一份血檢只涵蓋體檢嘅一小部份, 祇可作為簡單嘅內臟評估, 幾個數字點可能變身先知, 會知道生命仲有幾長嘅路！
但有份report都好, 呢份血檢同照嘅X光報告, 比咗我參考去幫波波嘅方向, 亦多謝好朋友A比我資料, 提醒咗我氣管問題都可以用中藥去修護; 睇咗份資料, 有提及其中某種中藥, 原來幾年前波波睇林醫生時, 就有用過呢個複方, 既然之前有用過無唔夾出意外, 我就再回歸用呢個中藥幫忙; 腎氣丸已經用咗兩年多, 加上順勢療劑keep得還可, 今次差啲攞佢命嘅係氣管病, 我就寄望喺蘇子湯！
除咗用藥同補健品, 氧氣對波波幫助好大, 晚間氧氣較稀薄, 我仍然要放佢入氧氣箱, 否則佢半夜會醒, 會發出唔舒服嘅叫聲; 之前我見佢脷仔顏色唔靚, 以為佢有貧血, 仲一直比佢飲南棗湯, 原來佢氣管收窄咗偶會缺氧！
 |
| 波波算有D笑容了 |
照顧波波算暫時有個方向, 等調養一個月後帶佢覆診, 希望已經降低返個肝酵素, 唔會又有其他嘢又嚇我一驚啦, 雖然都身經百戰, 但呢個仔係我心肝, 好難唔擔心佢嘅健康！
達達豬應該係attention seeking卦, 扭計咗一日要餵食, 呢兩日已回復正常, 我放波波喺床仔, 佢仲主動擠埋上床, 都好耐無見佢哋咁友愛喇; 會唔會動物都同人一樣, 歡喜冤家咁平時吵吵鬧鬧, 但意會到伴侶有病, 會更珍惜餘下嘅相聚時光?
哈哈, 應該係我諗多咗喇.....
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
