 |
| 好老友喎， 朋友話好似幼稚園！ |
每日都激增冠狀病毒肺炎個案, 已經蔓延到有獸醫院員工發病, 人流密集嘅地方, 都唔知防護要點加強, 人心惶惶！
我哋作為毛孩家長, 最擔心唔係自身安全, 最怕係自己染病, 禍及無辜嘅佢哋都要被迫隔離, 咁先攞命！
如果好似波波達達嘅健康情況, 要人貼身餵藥, 必要時供氧, 仲要波波生性咁緊張, 又睇唔到自己行唔到, 食嘢便便時都要比力扶住後腳; 達達又時有公主病, 唔餵就唔食, 咁真係會無命; 搞到我壓力極大, 好耐無發夢嘅我都一連兩晚發惡夢, 夢見豬仔被捉我快要發狂！
我已經用盡心力照顧佢哋健康, 如果因為外來因素導致佢哋丟命, 唔敢想像....
本來波波食完藥, 一切穩定要覆診, 做個blood test睇吓肝酵素情況, 依家咁環境我要一切暫緩, 反正佢指數唔係升得極高, 唔會即時致命, 而且我相信指數高部分原因係因為食咗西藥, 想比啲時間食supplement排毒清肝, 權衡輕重下都係留喺屋企為上！
波波每日都要入氧氣箱, 無論是否供氧, 佢都要坐喺裡面先唔發出嚶嚶聲, 睇咗網上解讀幾時要供氧, 我決定比兩隻豬無發病時都入去吸短時間做保養.
曾經想放佢哋坐埋一齊, 達達會無咁抗拒入箱, 但阿女話兩隻一齊要留意二氧化碳排出問題, 咁我唔識真係唔敢亂嚟, 放一齊坐就打開門為上!
 |
| 打開一邊門一齊吸一陣氧 |
見到網上有人解釋, 氧氣機並唔係純氧氣, 正確係叫製氧機; 從空氣中嘅氧氣過濾出來, 變成濃度大概90%嘅氧氣(空氣係21%).
用製氧機個概念就係動物每呼吸一啖, 就等於呼吸左四啖半; 動物因為呼吸系統功能有問題時, 細胞唔足夠帶氧氣比身體, 器官唔夠氧氣就會有呼吸困難情況同埋衰竭問題, 當下就需要更高濃度嘅氧氣去幫.
製氧機增加咗每一啖氣既氧濃度, 就好似提高咗肺嘅效能一樣, 等動物呼吸時唔使咁辛苦用力去搶氧氣.
 |
| 打開門稀釋咗制氧濃度, 做吓保養都好過無啦！ |
至於幾時要用製氧機, 就係當呼吸系統功能唔完全嘅時候, 例如達達心臟病, 肺壓高, 波波氣管下塌呢啲病, 病發時就好需要氧氣救命！
至於平時我決定用來保養, 因為用力呼吸會導致心臟變大, 佢哋呼吸系統唔可以叫健康, 有需要幫幫.
當然如果健康嘅肺就唔適宜長期入氧氣箱, 咁樣會令到肺部開始懶惰, 唔識自己帶氧; 所以用唔用氧氣, 要自己衡量動物嘅呼吸情況!
 |
| 夜靜達達肯入去吸一陣間 |
後記: 最近睇咗另一篇有關吸氧嘅文章, 同上述網友講嘅有出入, 內文係話制氧機輸出9X%嘅氧氣, 並唔等同你吸入一樣係9X%, 所以動物每呼吸一啖, 就等於呼吸左四啖半係唔成立嘅; 原來有條程式計算, 制氧機輸出9X%嘅氧氣, 毛孩真正吸入嘅大概係31 - 33%左右, 仍係比空氣為高, 所以對有心肺功能唔好嘅動物係有一定作用!
一般吸入60%氧氣隨時會中毒, 而氧氣公司可以租出比你家用, 係一定排除呢個中毒嘅可能性, 所以先會出租!
大家選用氧療都係要搵多啲資料, 如果制氧機輸出不足, 又將毛孩困入箱中, 吸入嘅有可能低過空氣嘅21%, 咁就有反作用喇！
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
