最近曾經想過唔再繼續寫呢個blog了, 生活乏善可陳.....
但靜落嚟細想, 一開始寫呢個blog, 原意都係當日記咁寫, 係想記錄低同幾隻豬仔嘅日常生活, 日常生活就係咁啦!
始初寫blog時, 無諗過原來分享自己嘅某啲經驗會幫到人, 直到有網上朋友搵到我, 想瞭解清楚某啲我用過嘅方法同補充品; 因為有某啲近似病例, 大家都想試吓對自己嘅狗狗是否適合!
於是, 呢個起初純為日記嘅blog, 變咗有另一重意義, 當然如果可以幫到其他狗狗我好開心!
最近, 我已經無咩可以同大家分享, 既無再搜尋新嘅補充品, 對維護達達嘅健康亦無任何新嘅概念, 因為我唔敢有任何改動, 只求佢生活得舒服平穩!
於是問自己係咪一個right timing去停止呢個blog嘅更新?
然後, 出現咗呢個issue...
做咗波波嘅陶土公仔後, 因為做得好逼真, 所以我再做心愛嘅叻叻, 但當收到圖片展示最初制成品, 我覺得完全唔似, 但係邊度唔似? 我完全講唔到個重心....
叻叻曾經係我刻骨嘅摯愛, 然而今日我竟唔能夠將佢嘅特徵口述詳細描繪, 我問自己有可能嗎?
但我真係唔識講, 即使有相片輔助, 都係表達唔到嗰種活生生嘅神韻; 所以改咗幾次, 公仔都總係唔似真實!
但唔怪人, 好明白嗰種難度, 原本手功就係咁, 一方面靠幸運, 一方面要配合, 更難講到嗰種虛無飄渺嘅所謂神韻!
原來時間真係可以將記憶糊掉, 而回憶亦似有選擇性, 只會記得那最深刻!
原來記憶係要靠其他外來幫助去維繫, 例如相片、視頻, 無咗相關輔助, 何來記憶猶新?
而相片、視頻, 經過時間嘅流逝, 亦會變得蒼白, 要仰賴文字先可以記錄深刻, 可以比我日後回味細品....
從文字中會提醒我, 原來過去不單單有苦痛, 有快樂, 仲有好多好多彌足珍貴嘅小事, 呢啲無關痛癢嘅小事, 回味起嚟係好暖心!
呢幾日, 係我呢一年來過得最好嘅日子, 達達健康平穩, 無咩特別擔心!
阿女帶貓貓過嚟陪吓達達....
我同達達改咗喺洗手盆沖涼, 要快手, milky spa唔再可能!
仲可以閒來重拾好耐以前嘅生活, 窩喺床上睇小説, 達達喺我旁邊瞓; 突然有一種歲月靜好嘅感覺, 一種最簡單最原始嘅享受!
好希望呢種日子可以更長久, 平靜嘅心好難得; 而文字記錄, 無壓力咁繼續吧, 畢竟係未來日子比自己嘅一種陪伴, 就回到起點, 讓文字幫助歲月留痕!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
