18號, 波波離開半年了, 可以放低了嗎? No!
何必一定要放低? 我將我哋過去一齊生活嘅日子來來回回重溫, 其實都無咩唔好; 人生就係咁, 總需要有其中一半嘅存在, 去証明另一半, 就如有天有地, 有善有惡, 有甜有苦, 有想念波波嘅心痛, 亦帶出往日甜蜜嘅互動!
雖然無咗波波喺身邊好失落, 但回想過去嘅每個片段, 仍會感覺好滿足, 誠實面對自己, 原來係咁固執又頑固🥴!
早兩個多星期都憂心忡忡, 事關阿女病咗唔舒服, 呢個時候有病真係草木皆兵, 萬分驚恐!
雖然對出現呢種情況一直都有擔心, 但殺到埋身唔識用文字表達嗰種惶恐！
還好因為佢近來工作較忙無返來我度, 又可能佢太忙碌以致工作過勞先會病倒; 其實阿女有病理應多加照顧, 但佢有貓貓我有狗狗, 祇好叫佢自我隔離, 真係唔敢緊密接觸!
好怕有萬一, 我真係唔敢想像要送達達去漁護處呢條係死路, 唯有叫佢快睇醫生做個測試評估!
個女有病我避而不見, 做阿媽衰到咁其實個心好唔舒服, 但係萬一, 萬一有事都有個後路嘛, 起碼兩星期無見過面無接觸, 我無受感染都仲可以幫忙將貓貓照顧!
 |
| 還好兩隻貓咪都好肯跟我 |
還好休息幾日佢已經康復, 測試亦過關只係普通感冒, 呢段期間心情真係唔好, 個心七上八落好煎熬!
真係無可能往後一直都無病痛, 一有病又杯弓蛇影擔驚受怕點算好? 疫情未受控仲好似來勢洶洶, 更難保証一定唔會感染到, 再小心都未必有用....
呢個疫症真係各方面都影響好大, 誠心祈求早日受控🙏!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
