呢段期間心情真係麻麻, 又有兩個朋友都有傷心事, 我寫blog都無咩心機!
其一係狗狗突然離去, 佢陪住媽媽一齊坐, 靜靜離開咗媽媽都唔知, 呢個突變要一吓間接受當然唔容易, 但其實係一種福氣, 無受病魔糾纏無辛苦過日子, 真係上天嘅恩賜!
不過因為狗狗同3隻豬仔相若年紀, 亦係同一個breeder繁殖出嚟, 感覺特別唏噓!
另一個係認識多年嘅朋友, 佢都係有3隻豬, 眼見佢一直對狗狗照顧得無微不致; 喺照顧狗狗健康上, 我哋都會有交流, 好不幸 3個月前其中一隻狗狗因為腎衰而走, 都未曾回氣, 另一狗狗又出事....
狗狗經過連串血檢, xray+超b, 驗出個肚仔有腫瘤, 聽到呢個消息我真係百般滋味.....
接續住咁一關一關跨過真係唔容易, 好明白嗰種壓力, 有如千斤重擔, 壓落嚟真係抖唔到氣!
狗狗都十幾歲, 雖然我好清楚, 係會有不同健康問題慢慢浮現出嚟....
天氣差, 諗都唔敢諗帶兩隻豬仔出去, 努力控制住室內溫差, 但達達呢兩日又有返少少鼻水, 無出呢個問題已經算係一段頗長日子; 都係唔會用藥, 用manuka honey + liposomol C 幫佢!
呢D小毛病小問題OK👌, 最緊要佢個心仔無事!
波波皮膚問題大致上好晒, 少咗毛毛嘅地方都逐漸有幼毛出返, 有能力康復當然係好事, 但蛋白尿問題要控制都係唔容易!
我已經唔再睇化驗數字, 無嚴格戒口, 亦唔設太多規限, 狗狗嘅一生好短暫, 又無須要實踐偉大抱負, 最充實莫過於食得瞓得痾得無困難, 如果當下佢仲食得開心, 我唔想太多限制, 祇做些微調較!
網上見到有媽媽遵從醫生指示, 狗狗嚴格戒口肉都停晒, 結果得到理想嘅驗血報告, 真係好戥佢開心啦; 好佩服呢個媽媽, 肯堅持配合醫生咁聽話(呢個醫生我3隻豬都睇咗好長嘅一段日子), 不過自從豆b離開後, 兩隻豬仔都轉咗醫生喇, 唔係每個醫生會同意我呢D有限度嘅放肆😜!!
或者我算係怪獸家長, 我唔捨得set得咁嚴格, 當然各人有唔同想法, 而主要係我兩隻豬仔都快13歲, 已算係年紀老大, 我祇求佢哋生活得開心舒服, 已經一把年紀, 我就放縱D啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
