自從買咗部新嘅空氣浄化抽濕機, 兩隻豬仔呼吸道問題真係好咗, 波波氣管敏感咳少咗, 達達就算有鼻水一兩日都控制妥, 同之前一日猛打乞嗤, 鼻水長流到面毛都濕咗, 真係好大區別啊!
雖然我一直都有用空氣淨化機, 但可能馬力唔夠大, 如果大家嘅毛寶寶都有呼吸道症狀, 可以考慮吓換部大馬力嘅機試吓, 管理好空氣質素真係最重要嘅一環!
每日打開facebook, 動物群組內一個個不幸嘅消息自動彈出來, 有狗狗中風, 有狗狗有腫瘤仲要爆咗, 睇到好多之前完全唔認識嘅病例, 感覺生命真係脆弱如泡沫, 可以頃刻就爆破!
睇得越多, 感受唔同咗, 以前會情緒低落, 依家就漸漸睇化咗; 實在太多病例都係來得突然, 完全無時間比你為病情張羅, 生命一吓子就走到終點, 唉, 真係化囉!
望住兩隻豬仔, 只餘下卑微願望, 唔奢望長命百歲, 只求無病魔折磨, 每日舒服無痛苦咁過!
波波睇唔到, 行唔好, 蛋白尿問題都唔會好, 只會越來越差唔會有進步, 點到我接受唔到?
達達心仔問題都唔會好, 退化咗嘅器官何來會有進步? 控制住唔辛苦已經係福報!
時間過去年華漸老, 身體器官退化係所有生命都避唔到, 我何必要自虐, 硬要同過去作比較咁老土?
其實道理我係明白, 但要接受都需要經過一段長時間調較!
要記低日常生活每個開心小變化, 要比自己一個空間, 去欣賞吓佢哋偶爾仲會表現嘅古靈精怪!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
