我諗近日都無咩人心情好好, 影響到情緒都會有不同因素!
而我心情亦有好大波動, 因為琴晚, 朋友狗狗離世, 好突然, 意外又急促...
近呢兩日佢有話我知狗狗有鼻水, 係透明無色無味, 食慾精神都仲好好, 探熱無超過正常溫度, 但有比起佢一向嘅體溫稍高...
佢有問達達鼻水問題, 我亦分享我係用manuka honey, 對達達係有用!
完全同"死"呢個字扯唔上等號, 朋友都係緊張媽媽, 唔會見狗狗辛苦乜都唔做....
琴晚幾個鐘頭內情況急轉直下, 突然呼吸急速, 當佢sent條片比我睇時, 我叫佢快D急診, 狗狗要氧氣幫助; 但好快咁佢就喺媽媽懷中離開, 向彩虹橋邁進😭!
生命何其脆弱, 一刻就爆破好似肥皂泡, 媽媽都唔明白原因, 唯一估計係心臟問題, 或內臟有腫瘤但一直都唔知道啦!
我哋身為毛孩媽媽, 真係對佢哋有病擔驚受怕好苦惱, 點做先係正確? 點先對佢哋最好? 佢哋想要嘅同我哋所諗嘅有無唔同? 有時都唯有套入自己嘅角度!
從來生死無得預計, 要走嘅都挽留唔到, 做咗應盡嘅責任同義務, 就只能祈求走得安樂唔辛苦, 無拖住捱時間就好!
好記得有醫護朋友嘅講法, 佢話急救只係對突發意外有意義, 如果已經係器官衰竭, 勉強拖住其實係意義全無; 衰竭嘅器官係唔會復原, 急救後係有可能暫時舒緩到, 但過度醫療對生活質素唔會保持得好, 而且佢眼見大部份病患都唔會拖好耐, 以佢自己喺獸醫界多年所見, 佢個人睇法係不必要勉強去做...
當然每個人有唔同睇法同見解, 而且企喺外圍去睇件事, 做旁觀者同置身其中, 想法做法都會唔同, 佢都有話自己可能係講一套做一套, 到自己嘅寶貝有事佢都未必會冷靜到!
生有時死有時, 傷心難過避唔到, 但可以點做? 唯有放開懷抱, 祝福寶貝未來活得更好, 每個生命都會完結再行新嘅一段路, 或者佢先行一步, 係想去幫我哋鋪條好好嘅路, 今生我哋照顧佢, 來生佢想回報😊!
小YY, 一路走好💐!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
