遲來嘅祝賀, 祝福大家過咗個快樂中秋節, 但願大家每日都快樂!
我呢個中秋就麻麻哋喇, 事關達達又出事, 又突然大聲尖叫, 驚天動地嚇死我!
即刻滴順勢療劑, 再檢視佢脷仔, 睇吓牙肉血色正常與否, 已經飽經鍛鍊熟習去做呢一切; 雖然個心都係好驚, 但情緒已經可以控制!
達達距離上次病發已經係 5個月前, 其實已經好叻豬仔, 我真係好多得有順勢療劑!
達達今次發病情況較輕微, 可能我反應及時, 一聽到叫聲我有即滴療劑, 佢好快恢復正常; 有時會覺得急救用嘅順勢療劑好似人類嘅心臟脷底丸一樣, 要用得及時救治得快, 希望可保到命仔!
然後我會比氧氣佢聞吓, 呢D係家用式保養, 唔同救命入氧氣箱啦; 達達好叻豬㗎, 佢覺得有需要會用鼻仔索吓索吓, 相反佢會掙扎走佬, 無得迫佢就範!
所以我真係唔敢常出街, 每次出外都急急腳往返, 盡量配合啦; 屋企一定要有人望到實, 自己時刻webcam監察, 亦重重覆覆對老公同工人姐姐講解, 萬一有事要冷靜達豬先可以過關, 做得嘅都盡量做足, 急救藥放於床邊最當眼!
呢種慢性長期病患, 祇可以緩和拖延退化速度變慢, 老化咗變差咗嘅器官都無可能救得返, 我但願佢哋唔會辛苦就好喇!
波波近來好乖, 每晚自己瞓床仔, 無妒忌達達每晚跟我瞓喇; 我都好識做嘅每日會抱佢多D, 有解釋達達情況佢知, 佢好似明白, 無心情唔好亦無兇達達, 個仔最抵讚😘!
個仔情況唔太壞, 除咗膝蓋移位無得搞, 依家行得頗艱難; 每日都有幫佢做按摩, 保住肌肉唔萎縮, 亦有做鍛鍊運動, hold住佢腳仔時仍感覺佢係有力有肌肉🙏, 個心稍感安慰喇, 會再諗諗要點幫佢行!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
