 |
| 相片連結 |
波波已經好習慣用步行輔助帶, 今次我覺得自己抵讚, 可以搵到個方法幫波波行!
波波膝蓋越來越差, 呢個情況我預咗喇, 之前P姐姐同R哥哥都講過, 想復原係無可能啦, 只好周邊諗辦法, 幫輕吓佢負擔!
有想過再做laser therapy, 復健按摩, 因為P姐姐太遠嘅關係, 我有搵過另一間; 呢間嘅治療師都係同P姐姐同一個師傅教出嚟, 而我又知道之前同波波一齊做laser嘅導盲犬google, 都有去呢度做復健按摩, 效果幾好啊; 可惜同治療師溝通後, 話google情況同波波分別好大, 波波除咗手術, 做任何復健都幫助唔大, 咁我唯有諗其他方法!
好慶幸搵到呢條步行輔助帶, 而幸運地最後同波波好夾, 個仔上帶後有咗依靠, 行得開心返; 或者有我帶住佢行, 佢唔怕睇唔到有碰撞, 行得好放心啊, 每次佢想上帶都會比我signal, 自己行來搵我, 咁我就帶佢行, 上咗帶佢可以行耐D, 唔怕跌吓跌吓!
一定要keep住郁動夠, 少運動對全身影響都大, 我無忘記運動後同佢做返按摩鬆弛肌肉, 當然艾灸, 無針針灸, 場效應等等嘅保養唔會偷懶; 忙係忙D, 但忙得開心, 起碼唔係祇坐喺度心痛嘛!
達達豬嘛, 仍然中氣十足, 日日鬧人發脾氣, 佢個心仔我當係維持住, 無太大變化就唔理, 朝住已選擇嘅路繼續行; 不過佢有樣嘢有進步, 就係佢嘅腳仔, 可能CBD oil幫到佢行多D, 兩隻後腿肌肉明顯比之前發達, 摸落有大大舊豬展, 呢個算係意外之喜啦!
但佢眼仔差咗, 之前帶佢睇眼仔時, 醫生話佢有極輕微白內障, 但最近望落係明顯咗, 不過隻豬快13歲, 都唔算太差喇; 即管用眼藥水幫吓, 之前Dr.M開過比波波, 但個仔試過無效, 希望達達OK啦; 呢隻眼藥水我記得係草本, 相對安全, 不妨試吓, 但每個身體反應唔同, 都要小心觀察住啦, 最希望當然同達達夾, 幫到佢延緩老化!
狗狗真係無言老師, 佢哋教識我好多道理, 有朋友話波波達達現時狀況明顯同以前無得比, 係一個天一個地, 點解我仲咁歡喜?
的確波波整體狀況係比以前差咗, 但基本生活質素仲可以維持, 其他我可以輔助, 主要食得瞓得痾得已經好完美;
達達嘛, 除咗擔心佢突然尖叫又病發, 同埋胃口時好時壞, 基本上變化唔大, 年紀大總要面對機能衰退嘛!
養狗狗令我感受良多, 教識我喺不完美中找尋樂趣, 我開始將執著性格嘅菱角慢慢磨滑, 亦比以前較可以面對失去!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
