2019年9月6日星期五

Happy 13th Birthday Ball b🎂

換咗個新電腦, 好多setting都唔同咗, 我呢D電腦白痴真係有排摸, 考起我!
今日係波波13歲生日, 簡簡單單整咗個蛋糕仔為佢祝賀, 不過整得好樣衰😀, 可能自己唔跟比例, 想落多D材料, 出嚟嘅效果嚇親我😱!

無所謂, 醜樣我都睇唔到, 最緊要好味!

不過無所謂啦, 最緊要啱波波, 阿女問我放咗D咩怪嘢喺餅面, 其實係茅屋芝士加鹿心粉, 事關依家波波係靠晒個鼻仔辨別味道, 一定要佢聞到鍾意先會賞面囉😋!

年紀大喇低調D算, 自從豆b離開後, 都無再做佈景影主題照!

呢兩年間行嘅路真係唔容易, 雖然我無每次講及佢哋身體有事, 但兩隻豬嘅表現都成日令到我個心七上八落, 好難平靜D; 都無咩特別願望囉, 但求乖仔每日舒服咁過, 無大風大浪我就好安樂!

諗返起13年前帶呢個仔返屋企, 嗰日係冬至, 好凍嘅天氣!

當時佢細細粒好得意, 為避免凍親佢, 喺返屋企途中, 阿女將佢放咗落自己嘅大褸袋, 將佢袋住, 保護住小BB!
仲記得返到屋企一放佢落地, 佢好似個波仔咁, 彈吓彈吓咁跳來跳去, 睇住佢喺地上有如個彈彈波, 超得意, 就決定以後叫佢做波波💖!

時間匆匆咁過, 一轉眼乖仔已經咁大年紀, 垂垂老矣; 回顧過去拾多年朝夕相對, 睇住佢從一個彈彈波, 變到如火箭速度咁跑馬步, 然後到今日屈服於膝關節移位, 出街祇可以坐車仔, 想再拖住佢散步已經成為往事; 從眼仔精靈到失去視力, 身體機能慢慢衰退, 不勝唏噓😔!
有養狗狗嘅都一定有相同願望, 當寶貝漸漸老去, 都祈盼時間大神可否行慢D!

不過, 我好感恩波波仍陪喺我身邊, 我會盡力為佢打造適合嘅環境, 比佢適當嘅藥物治療, 會更珍惜每一日嘅共處; 波波係叻叻豬, 往後每年你生日, 媽媽都會比心機做好味蛋糕比你😋🎂🎈🎉!

好多朋友都知我對波波有偏愛, 我會歸咎於緣份, 當然做得我仔女都係緣份深厚, 所以我都好錫達達同豆b, 但波波同我嘅連繫確實唔同D, 好難言傳, 嗰種感覺祇有自己知😜💕!

朋友話達達好靚女, 豆b係可愛豬, 外形上波波都輸比兩個女, 但佢偏偏喺我心中地位最特殊; 無得解釋, 自然而然植根喺我心深處😍😘!