波波真係行得差咗, 眼仔睇唔到一定有關係, 但佢嘅退步主要係膝關節移位產生嘅問題!
行得差唔係因為肌肉流失或腳仔無力, 每次我幫佢做按摩, 都感覺到佢腳仔肌肉仍強壯, 而佢企定開餐, 只要膝關節骨無移位, 佢都用到對有力嘅腳仔!
但佢每行一步, 韌帶都會從滑車窩跌出嚟, 明顯對佢步行有限制, 如果佢勉強用隻腳仔, 應該會扯住痛, 但將重心放一邊, 又唔係長久之計....
 |
| 還好便便暫時無問題 |
諗爆頭要點幫輕個仔, 補充品對呢個issue作用唔大, Rose-Hip Vital 都食咗三個禮拜; 照燈按摩都祇係周邊幫助, 希望佢唔好關節僵硬, 唔好有肌肉疼痛關節炎等等問題啦!
佢行得差就一定會少咗行, 我見佢行吓跌吓又怕佢受傷嘛, 輪椅個仔又唔啱, 咁要點辦?
最後, 試用呢條步行輔助帶, 初次嘗試似OK啊!
當然波波一定唔習慣, 我提帶都要學習, 往往不自覺向上拉, 後腳離地就唔啱啦; 可能一般人都會將呢個錯誤犯, 所以說明有提示圖解, 我同個仔都要慢慢習慣!
琴日第一日分階段試用, 波波從開始爭扎, 跟住倒後行, 然後企定去感受, 去到肯嘗試踏前, 到最後開始習慣!
講真我哋雙方都仲要配合練習, 但波波有咗條帶卸力, 明顯願意行, 都好耐無咁開心行到唔停, 但我怕佢一下子行咁多, 搞到受傷就慘啦, 要循序漸進慢慢嘛, 要除帶休息喇!
感覺呢條步行帶有幫助, 我會好耐心同波波一齊練習並面對可能遇到嘅困難; 以後起碼可以行多D, 唔使行到跛吓跛吓, 或者大部份時間都係坐同瞓咁慘嘛!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
