琴日都有同兩隻豬仔落平台花園行吓, 波波行動不便, 要用條步行輔助帶幫助, 唔適合出大街; 喺一個可以掌控嘅範圍內行吓, 既可滿足佢對外界嘅刺激, 我壓力又唔大; 更感謝屋苑管理通融, 知道我只喺無人時間拖佢行10分鐘, 無將我驅逐🙏!
琴日超大風, 有影響波波行動, 佢行得唔太好, 咁大風係有阻力, 佢腳仔唔好係較難操控; 見佢行得頗吃力, 右腳吊起唔著地, 都知佢難handle, 如果無咗條輔助帶幫忙, 我諗佢連企都應該企唔到!
縮短行程放返佢上車仔, 打道回府喇!
 |
| 真係好大風, 好似吹得起波波, 佢驚驚呀! |
要讚吓達達, 喺咁大風下佢竟然肯行, 不過我只敢比佢行幾分鐘, 怕佢心仔負荷唔到; 自從確診佢有心雜音, 之前嘅尖叫應該關乎肺壓高而唔係個腦, 已經加倍小心照顧, 但呢種病根本無得醫好, 就如一個計時炸彈睇吓幾時引爆, 我衹求佢一直唔辛苦啦!
 |
| 波波吊起右腳, 達達都表現幾好 |
一直上網睇好多文章, 宗旨都係「comfort care rather than curing the disease」, 我為佢選舉擇順勢治療呢條路, 基本上係做得到!
喺控制佢病發方面算做得幾好, 明白呢個病係用任何藥物都醫唔好, 只可以將去到尾聲嘅過程拖慢, 我有心理準備有可能突然好似肥皂泡, 一爆破生命就告終...
無得驚亦無得諗可以點做, 但求目前維持得好, 亦但願有朝一日達達唔會辛苦就好!
兩隻豬仔都有不可逆轉嘅慢性病, 我希望我可以做到最好, 喺過程中佢哋唔好經歷痛苦; 我自己唔怕死, 因為一吓子就乜都唔知道, 但我怕辛苦😱!
用呢個思維去諗, 生命總會告終, 只要佢哋唔辛苦, 雖然不捨我願意由我承擔別離嘅痛!
盡量享受每日共處嘅時光, 一陣又同佢哋去街街, 等佢哋開心渡過每一日, 媽媽做嘅祇可以到呢步!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
