 |
| 相片連結 |
好似好耐無updated個blog, 皆因近來好多嘢要幫阿女打點, 早前貓仔唔舒服, 要去睇醫生戴住頭罩, 食嘢唔方便, 我要去餵食係理所當然啦; 每日跑來跑去, 仲有其他嘢要兼顧, 真係攰到一個點!
跟住落嚟, 應該都唔會有空餘時間喇, 因為姐姐從加國回港, 一定要出去相聚見吓面; 每次一別又幾年, 人生會有幾多年? 無可估計益發更珍惜每次嘅相見!
點忙點亂priority都一定係兩隻寶貝豬行先啦, 今日天氣唔錯, 帶兩隻豬仔出去行吓先!
波波喺屋企試用咗步行輔助帶都有一段時間喇, 今日比較空閒, 就帶兩隻豬仔出去行行; 好開心見到波波可以快步咁跑, 雖然佢係要有倚賴, 但能夠重拾自信又唔會跌吓跌吓, 我滿足喇!
 |
| video |
自從波波衰咗個膝關節, 我唔敢勉強佢用隻右腳, 反正決定咗唔會做入侵性治療, 保護佢靱帶避免受傷當然緊要; 好幸運波波願意用步行輔助帶, 咁幫佢腳仔卸到力最重要!
每日多咗例行工作, 一日要多次用輔助帶拖住波波行, 至於其他物理治療, 因應時間輪住去做都有必要!
無忘記R哥哥叮囑要強化肌肉, 唔敢比佢用右腳勉強行, 怕膝蓋骨滑出扯傷靱帶, 但企定練習就唔可以免喇; 每次做完鍛鍊, 亦必定依從P姐姐所教, 幫波波肌肉放鬆返!
世事豈能盡如人意, 身體健康隨住時日衰退, 係理所當然, 可以喺不完美中尋求完美, 於自己嘅人生搵生存意義, 係目前我必修功課嘅一頁!
無提起過達達豬, 真係越少提起越好, 都係no news is good news; 已經一把年紀, 要生活得無風無浪都唔係易事, 佢表現尚算OK啦; 但眼仔白內障明顯比以前差, 就快13高齡, 都唔算難接受喇; 以佢身體心臟嘅情況, 我當然唔會選擇麻醉做眼仔手術, 目前佢視力未有問題, 見步行步算喇!
依家對一切不可逆轉嘅狀況, 正學習平靜接受, 冷靜咁諗吓點可以做得更好, 歇斯底里嘅情緒根本於事無補, 雖然係知易行難, 都盡量嘗試啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
