 |
| 放部手機入去播dog relaxing music 等佢calm down |
波波睇完醫生, 食藥後未達到我預期想要嘅效果, 仍然係咳得好頻密, 上星期日咳得太用力, 大小便都失控直噴😰!
真係最差嘅星期日, 一方面要安撫個仔情緒唔好咁繃緊, 越緊張呼吸困難就越咳, 然後又要同佢洗下半身, 佢情況咁差沖涼當然唔敢！
整理完波波從洗手間行返入房, 一見自己張床就頭暈, 本來達達喺床瞓緊嘛, 點解會見到嘔吐物? 隻豬嘔完仲要兩頭騰, 踏到我床鋪枕頭都濕立立😱!
七手八臂發揮我嘅小宇宙本能, 快速清理災難現場, 工人姐姐放假得我一個人, 就突顯無工人時遇事真係狼狽甚!
達達嘔完無影響佢精神, 可能今早食得太急, 對佢我唔擔心; 但波波咳嘅情況依舊, 唔可以話全無好轉, 基本上日間除咗進食飲水會刺激佢氣管, 大小便時轉圈影響佢呼吸, 係明顯少咗咳, 但入夜就咳到嚇死人!
唔明點解入夜分別咁大, 前晚老公仲話以為佢過唔到當晚, 因為佢咳到呼吸困難, 好似快要窒息咁!
 |
| video |
原來咳嗽對氣管收窄危害有咁大, 我從未見過情況可以去到咁差, 怪唔得見到有群組分享, 狗狗至死原因唔係因病轉差, 係死於呼吸困難氣管下塌!
我一直知道波波氣管有收窄, 所以之前會糾結要麻醉洗牙, 但幸運地我以前從未見過佢病發!
可能時日過去, 佢年紀漸大情況變差, 今次出現咁嚴重情況我要計劃吓!
 |
| 有咗純氧幫助波波明顯舒服晒 |
每晚夜間我都唔敢瞓, 但唔瞓對佢都無幫助, 只可以及時發覺異狀, 咁於事無補啦; 波波夜間真係差, 越咳佢越辛苦, 越辛苦就越緊張以致呼吸困難, 我又極抗拒去24小時醫院, 去都係將佢放氧氣箱啦; 太清楚波波性格, 未失明時都咁緊張, 依家要佢離開我去留醫? 一定死得仲快!
去到咁critical嘅時間, 我部家用氧氣機已經作用唔大, 決定立刻租用醫療級別, 應該幫助更大!
多謝R媽媽比資料, 我第一時間填form sent出, 再打電話跟進, 氧氣公司肯幫忙配合, 答應即日送機, 咁有人情味嘅公司真係要點讚👍！
多日來, 琴晚我算係可以有幾個鐘瞓覺, 對個仔嘅情況我當然唔敢少咗監察; 無可否認有咗氧氣幫助好大, 波波呼吸順咗連帶都咳少咗, 咳少咗當然對氣管喉嚨都刺激少咗, 佢琴晚都算係可以好好瞓返一覺!
希望波波情況可以逐步緩和, 頻密咳嗽影響喉嚨腫痛, 心肺加壓嘛; 氣管下塌又係結構性問題, 藥物都幫助唔大, 我又要準備進入作戰狀態!
都係秉承住唔執著相處時間, 祇著重佢每日過得無痛苦就好啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用。但我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁啫, 不承擔任何責任。醫療上嘅問題, 請徵詢醫生!但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
