多謝大家whatsapp關心波波, 今次情況一度嚴重, 氣管收窄呼吸困難, 差啲入咗鬼門關！
見佢辛苦喘氣真係好心痛, 當下好想佢放棄, 唔想佢咳到快要斷氣咁慘, 低聲好溫柔同佢講, 叫佢唔好掛住媽媽放心去搵豆b玩, 唔好再撐！
口就係咁講, 個心就好驚, 好怕佢真係停止呼吸, 我好難面對咁突然嘅變化!
雖然明白人生嘅離別好多時都來得好突然, 上一秒仲係晴天, 突然就落下暴雨, 你最珍愛嘅花樽喺你一次擦抹時突然落地, 璀璨嘅煙花喺眼前轉瞬即逝, 漂亮嘅雪花瞬間就溶化....
人生路上, 太多相聚與離别都不在我哋嘅預料之中, 但發生喺自己身上, 我做唔到咁灑脫！
我一直都話唔在乎生命長短, 最緊要活得消遙, 一直都話心中有數, 可能離呢個日子唔遠, 但真係面對呢個時刻其實好亂; 咁耐以來平靜嘅心情瞬間瓦解, 我仍然未準備好咁快道別....
已經見過醫生, 又有用西藥, 再加上順勢療劑都好似幫助唔大, 點先可以將呢種結構性嘅病情減輕? 起碼先解決咗呼吸困難!
上網不停問有無過來人, 仲有無方法可以緩解？有人叫用風筒向佢喉嚨同背部吹熱風, 但一吹佢更氣促超緊張大嗌....
最後嘗試用豆袋加熱同佢敷, 一整晚就東搞西搞, 滴藥按摩乜都試齊個心亂晒!
還好折騰一大輪, 佢已經攰到謝晒, 呢個時候反而唔咳唔氣喘, 可以合上眼瞓一陣間; 其實波波最大障礙係緊張, 一有唔舒服就自己亂晒, 搞到換唔到氣用手猛扒口, 見佢猛典猛掙扎眼都凸晒比我好大驚嚇！
還好第二日有醫用氧氣機送到, 有咗純氧幫助, 當晚已經瞓得幾好喇！
從病發到今日都有3星期喇, 呢幾日情況唔壞, 已漸漸康復無咳無喘, 已經停咗西藥, 亦唔使長困氧氣箱喇, 不過每日我都有比佢入去瞓吓做保養！
今次呢場病, 波波都好傷, 都要一段時間調養, 仲食咗咁多西藥, 肝酵素一定高脹, 上次驗血肝酵素有升高, 食過西藥應該都有影響；波波對西藥反應極強, 但今次唔食我驚佢無命, 事有緩急輕重, 都係要先保命！
呢段日子以來, 達達好合作, 波波病咁耐, 佢一日三餐都自己乖乖進食, 無須我餵過, 但今日隻刁蠻公主唔肯食喎!
係巧合？ 還是佢知道我唔使再特別照顧波波？動物都有呢種認知能力? 今日公主要我一羹羹餵入佢口仔, 係佢扭計？呢個問題真係考起我！
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
