又差不多一個月無update個blog, 要點講好? 講得誇張D我會形容過去一週處於水深火熱中！
其實有照顧過年長毛孩嘅朋友都知道, 去到某個階段真係好辛苦, 身體上嘅疲勞還可以死撐, 但精神上嘅痛苦要點過渡？
呢個月來, 兩隻豬輪住比難題叫我應付, 一波未停又一波, 我已經乜都諗唔到, 祇求應付到目前就好!
達達早前又好似危危乎, 餵都唔食我好苦惱, 呢個情況係最唔好, 食唔好全身無力, 行到搖搖擺擺好似末日到; 但莫明其妙突然佢又胃口轉返好, 仲精神飽滿好似乜事都無！
呢種如過山車忽高忽低嘅經歷我唔係無, 去到呢個年紀都係避唔到, 反反複複我預計到, 總之可以平安過渡, 就當乜事都無; 以為可以歇一歇, 但又輪到波波, 仲要嚇到我命都無！
上星期波波開始有咳, 我用咗順勢療劑都幫唔到, 無得選擇下唯有用西藥, 即使我抗拒用西藥, 但都要優先考慮令佢唔辛苦...
但可惜用咗西藥感覺都係唔多幫得到！
波波咳得真恐怖, 咳到回唔到氣, 大聲尖叫嚇到我唔知點算好, 再仔細搜尋我所有順勢藥, 見到有acute symptoms心臟藥, 唔理咁多緊急下都好過無, 好幸運竟然撞中, 可以舒緩幾個鐘, 真係太好！
另外, 真係要多謝A嘅建議, 更多謝R媽媽借比我氧氣箱, 本來係諗住保養, 點知原來係救命!
見波波咁辛苦當然係放佢入氧氣箱, 即使我部氧氣機只係家用版原意係用於保養, 亦明白呢種制氧機不能不停開動, 但波波入箱後竟然瞓到, 不計後果都要選擇先保命！
 |
| 好驚部機燒咗無得救命, 但去到呢步唔用仲驚 |
真係多謝老天, 無叫我行絕路, 即使波波命數要經歷今次嘅辛苦, 但都指引咗兩位好朋友守護; 波波用咗緊急療劑再入氧氣箱, 幸運地可以舒緩到, 我當然全天候在傍邊侍奉, 一見佢有異動就立刻比順勢療劑佢用; 整個星期日夜守護, 通宵留守客廳中, 喺氧氣箱前陪伴, 祗敢半睡半醒瞓得矇矇矓矓！
今日好幸運, 波波成功抽到血, 仲可以照到xray, 今次診症算無白行到!
聽診心無雜音, Xray顯示size亦正常, 肺清無發炎, 但見到有氣管收縮！
呢個都係老問題, 不過我從來未見過佢去到咁嚴重, 今次真係被嚇倒！
以為佢蛋白尿控制得差, 腎指數一定唔好, 但出乎意料過咗兩年多, 驗血報告顯示都仲keep得幾好, 可能我依家做嘅算無行錯路, 不過肝酵素又有啲高！
Dr. Fung話我行對路, 叫我繼續; 因為xray睇到肝size正常, 肝酵素問題試用supplement幫幫, 希望有進步,下個月驗血睇結果再商討!
其實我對呢啲數字報告已經無以前咁在乎, 好與唔好都唔會盡信, 去到呢個年紀我更著重佢日常表現舒服, 數字靚但表現差有咩用? 好自然諗起豆b當日唔算差嘅血檢報告.....
但作個參考搵個方向總好過盲舂舂, 如果要做化驗波波又合作我唔介意做, 有個數據當然好過靠估!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
