冠狀病毒疫情仍未受控, 處於呢個環境中, 可以少出外就留家中, 最重要保住兩隻豬仔平安過渡, 唔受牽連為重!
達達呢排無咩特別, 正正常常, 其實都唔敢多講, 怕咗啲小氣豬唔受落又嚟嚇我; 真係覺得自己好迷信, 越養呢兩隻豬越八婆😝, 都已經唔係過去嘅我...
但遇到嘅巧合太多, 就唯有避重就輕, 起碼自己安樂😉！
琴日老公問我, 覺唔覺達達背部嘅毛毛變金黃, 老實對呢啲咁表面嘅變化, 我無晒感覺, 祇求佢哋起居飲食正常!
佢無退步我已經好感恩, 但如果話有進步, 會唔會係因為加入咗之前A推介嘅兩隻supplement, 有好效果?
因為A嘅狗狗食咗反應唔錯, 達達情況又差唔多, 可能都有幫助！
波波好叻, 會好清楚比signal我, 當佢有需要時會叫我, 我檢查佢脷仔嘅顏色就知佢有需要氧氣幫助!
雖然一直知道佢氣管差, 但無諗過會於一瞬間collapsed啊, 可能去到一個點就爆發, 有需要氧氣幫助!!
其實佢病發時會呼吸困難, 仲會用雙手猛扒個口, 真係好嚇人啊; 見佢用手抓個口我好驚, 上次見馮醫生有將情況同佢講, 佢有睇過口同脷, 用手喺外圍摸過相關位置, 無發現異常; 佢話想檢查清楚除非麻醉用內窺鏡, 但現階段佢唔同意咁做, 叫我先觀察唔好自己嚇自己搵嘢嚟驚!
不過抓口呢個動作, 自從補給咗氧氣係少見咗, 都有懷疑可能佢呼吸困難時嘅反射動作, 直到琴日見到FB上嘅一個post, 原來波波唔係唯一嘅case, 唔係個口生嘢都放心啲囉!
我當然唔可能見到佢扒口當無事, 最怕佢有息肉腫瘤果D嘛（杞人憂天我最本事, 改唔到好弱智), 試比順勢療劑, 希望幫到一啲; 題外話因為食咗呢隻療劑, 有意外驚喜!
波波前胸有一小肉粒, 好似保濟丸size, 都生咗有兩年幾, 一來知道年紀大會可能有呢啲, 二來醫生都話唔變大唔使理, 見無妨礙我就無處理!
今次因為怕佢口裡面有問題我唔知, 最安全用homeopathic remedy處理; 食咗療劑兩星期, 生喺前胸已有兩年幾嘅肉粒竟然消失無蹤, 開心死！
 |
| 依家波波最愛入箱吸氧氣 |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
