呢個復活節假期, 同阿女一齊嘗試做叻叻陶土公仔修補, 突然好似時光倒流回到過去, 記得阿女中學時期, 我哋都一齊做黏土ballet model!
因為阿女細個時曽習芭蕾舞, 都學咗一段頗長時間, 從幼稚園直到上中學, 仲記得去到on point階段佢話腳趾好痛😊;曾經一度佢迷上芭蕾舞劇, 每次睇完一個劇目, 都會親手去做個ballet model, 呢啲過去一齊做手工嘅日子, 係我哋兩母女最親密嘅互動!
 |
| 希望填上顏色後會稍好, 仍須再做輕微改動 |
今次因為叻叻公仔, 我哋認為有啲不足, 就膽粗粗嘗試去改動;老實講完全無把握做得好, 但都盡力試吓去修補; 無論修改是否成功(其實都好難成功), 因為有太多局限, 只可加唔可以減難度頗高, 不過都不妨嘗試去做!
波波都有做部份加工, 後腦做咗少少補充, 將輪廓做返飽滿啲, 呢個修改我哋都認同做得幾好😊!
今次嘅陶土修補施工, 令我再一次同阿女有回到從前嘅互動, 帶比我美好嘅回憶係始料唔到😍!
 |
| 波波原本已好好, 唯一可挑剔係唔夠立體嘅後腦 |
有時, 會有嚟得好突然嘅領悟, 有可能係突然聽到一首歌, 睇咗一本書, 聽咗一個故事, 生活上嘅小事, 甚至祇係睇到一張圖片, 都會做成自己一部份嘅改變; 今次從一個叻叻公仔, 終於面對自己嘅頑固!
我曾經唔肯承認時間會將刻骨嘅記憶淡忘, 但最近切實感受到, 時間真係會將過去雲淡風輕咁帶過, 活蹦活跳嘅叻叻已不復清晰停留喺腦海, 祇餘越行越遠嘅身影同深深嘅愛😢!
當然觸碰到傷口時仍會感覺痛, 因為曾經存在過嘅依舊存在, 但不得不承認, 久遠嘅回憶已漸漸化開變糢糊!
最近, 睇到一張好認同嘅圖片, 分享上facebook, 見到有唔同嘅回應; 當然, 感受因人而異, 每個人都會因應當時嘅環境、 心態、經歷, 有自己嘅尺度; 或者有一日, 我嘅感受都會同依家有唔同, 但呢個階段嘅自己, 感受到「珍惜後嘅失去」更痛!
「失去後才懂珍惜」, 係一種好遺憾嘅痛, 後悔當時自己無做得更多更好; 但當時點解無做得更好? 就係當時根本都唔知自己做得唔好, 無認為自己做得不足, 呢種痛係及後回想, 從反省得出嚟嘅痛!
就好似我對豆b, 我有遺憾自己當日愛得不足, 我應該比更多付出; 雖然我都好錫佢, 但失去後得出嘅結論, 對比起波波, 原來我個天秤明顯有輕重!
但「珍惜後才失去」, 因為珍惜源於深愛, 而呢種不由自主嘅珍惜係根深蒂固, 根本好自然深深陷入其中, 唔需要刻意就將自己湮沒; 然後失去, 有太強烈嘅比重, 我會覺得呢種係身不由己嘅痛!
就好似失去波波, 我感覺從未有過嘅痛入心扉, 難以形容!
不過依家我選擇隨寓而安, 如果當下仍感覺痛就由佢狠狠咁痛, 祇要唔影響正常生活, 隨性就好; 總會有一日, 好多我哋認為永遠唔會忘記嘅事, (這永遠有多遠?) 終究就喺我哋念念不忘嘅過程中, 被我哋遺忘!
再執著再頑固都唔可以拒絕相信....
時間可以撫平曾經鮮明嘅傷口, 生活仍會如常繼續!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
