上星期係寵物展, 今年阿女同我都有免費入場券, 但我哋都無去; 一來無意欲搵新產品, 任何新嘢我都唔敢比達達試用, 難得近來平平穩穩, 我唔敢多心; 二來都唔想去人太多嘅地方, 無必要都係遠離人羣, 新冠病毒疫情反覆, 唔敢掉以輕心!
有關今次寵物展, 聽聞好混亂, 有人比狗咬, 上載相片展示瘀痕, 仲有傷亡意外發生; 睇Facebook見到兩個貼文特別上心!
詳文：https://www.ohpama.com/642598/
一隻貓BB比隻柴犬活活咬死, 仲要貓B係喺主人貼身嘅胸揹包內, 點解隻柴犬可以伸個頭入袋內去咬? 點解狗主會比呢種事情發生?
當然我唔在場唔知實際情況, 但直覺係狗主責任最大, 老實講自己狗狗脾性自己最清楚, 如果有前科或已知有攻擊性, 點解唔好好約束戴住口罩? 呢種場合多人多動物, 可能某點就對狗狗有觸發, 其實呢種悲劇應該盡量避免啊; 唔通養動物真係要考牌? 動物係最無辜, 發生呢種事狗主責無旁貸 !
不幸嘅事已發生, 貓主一定悲憤又傷心, 睇住心愛嘅毛孩喺自己眼前被咬死, 嗰種悲慟實在太大....
還望貓B主人保重, 貓B一路好走, 在彩虹橋上生活愉快!
另外, 見到竟然有人, 會去偷人家捐助比動物團體義賣嘅產品, 真係對人性有疑問, 點解可以咁缺德?
講開針灸筆, 我又再講吓呢個產品.
我無專業版針灸筆咁高級, 但我一直有用加強版幫狗狗做保健,
如果唔係關節移位類屬於結構性問題, 對保護關節, 傷口消炎等等, 應該係唔錯嘅選擇; 除咗保養關節, 我都會幫佢哋照膀胱經, 可以加強血液循環保養身體; 自豆b開始, 幾年來我都無間斷過用呢枝針灸筆!
其實用任何一樣產品去幫毛孩, 又或者同一時間用多於一種産品, 對確定成效會有啲困難, 因為佢哋唔識表達, 根本好難釐清係邊種產品有效; 我對自己嘅毛寶寶, 一向都同一時間用多於一種保健方法, 總之無害嘅就多方面嘗試, 爭取時間只希望撞得啱, 所以都唔敢講用乜嘢最有效; 總之用咗有改進就邊種都唔敢quit, 唔敢怠慢!
不過, 今次係我自己親身經歷, 我就分享吓我自己嘅個人用後感, 因為可見証咗呢枝筆嘅功效 !
我一直對各種保健器材反應慢, 呢枝筆自己之前都有試過, 都真係無乜特別感覺, 可能當時自己各方面無乜唔妥, 對驗證效果無把握; 但早幾日突然間右手隻大拇指好痛, 痛到完全唔可以屈曲, 可能我最近多咗用iPad追小說, 一睇就幾個鐘, 連續多日刷屏就勞損咗隻手指公.....
一隻手無咗隻拇指就好似殘廢, 連開個樽蓋都無能力, 隻右手無曬用!
於是就地取材, 立刻拎起枝E-Acu plus來用, 不停照照照, 一日照多次希望止痛, 得出個效果好好, 兩日就完全康復, 可以回復正常活動, 呢個係自己親身嘗試咗嘅結論!
從一開始用呢枝微能量色光針灸筆到今日, 不經不覺已經有五年了, 呢幾年間變化好大, 最初用呢枝筆嘅係豆b, 同一直用來保健嘅波波都離開咗我😭, 依家只剩返達達, 不過我一樣有如常比佢照呢枝針灸筆作保健用; 因為自己驗證咗個效果, 我以後就更唔會偷懶, 希望達豬有生之年都唔會腳仔痛啦!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
