新冠病毒疫情一波又一波, 之前仲要一人感染變種病毒, 就要全幢樓嘅住客強制入住隔離營, 真係擔心; 一幢樓咁多人, 已經無關乎自己一家小心, 萬一要隔離我當然係對達達最唔放心!
還好後來政策又有改, 放寬咗強制入住檢疫中心🙏🙏🙏!
今日母親節, 都無咩好心情, 呢個疫情一日未受控, 都擔心禍及達達, 但阿女話盡量做好就唔再諗, 每日如驚弓之鳥壓力咁大太傷神!
今年, 阿女選咗好好味嘅覆盆子開心果蛋糕為我慶祝, 喺呢個風雨飄搖嘅抗疫時期, 藉著溫暖嘅節日加一點點甜味; 3隻豬仔, 只剩返達達陪我過節了, 當然同達達公主影返張合照好緊要; 往後唔想諗, 呢個母親節仲有佢陪喺我身邊, 我好感恩!
發覺上年原來無寫blog, 嗰段時間應該係波波情況麻麻, 生活正處於水深火熱, 自己心情唔好, 個腦一片零亂, 落筆有困難組織條理欠缺, 但我仍有抱住兩隻豬仔影母親節合照!
 |
| 2020年母親節 |
好難忘記當時嘅心酸, 好多謝喺外地嘅姐姐常同我電聯, 安慰whatsapp不斷, 曾經同佢有以下對話, 果然, 我嘅第六感好靈驗, 波波只陪多咗我4個月....
今日母親節, 對乖仔特別想念!
 |
| 2020年, 波波陪喺我身邊嘅最後一個母親節 |
達達情況係點? 視力應該接近睇唔到嘅階段, 遠距離一定睇唔見, 近距離還好眼仔仲有反應, 唔似波波後來已木然; 不過佢聽力差, 所以互動稍欠缺; 但佢比波波堅強, 雖然行得唔穩, 又睇得唔清, 但只要我陪喺佢身邊, 佢仍係好積極咁兩頭轉; 仲要打泰拳, 企唔穩跌完又打, 打完又跌😵!
呢個女好有時間觀念, 每日差唔多老公放工到家嘅時段, 佢就算瞓著咗都會知醒, 開始中氣十足咁呱呱叫!
每日等老公返嚟排排坐梳化食零食, 係佢最享受嘅時段, 阿女話佢仍有需求係好嘅徵兆, 我哋都會配合佢所有需要!
往後我會做得好, 喺佢有生之年, 比佢physically & mentally有適當照料, 去到最後要零遺憾, 我確信我有領悟於過去嘅磨練!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
