波波離開第8個月, 做咗呢個我最有感觸嘅視頻!
前一段日子, 曾喺FB上睇過一個video, 探討毛孩離世後會去咗邊度; 研究顯示肉體消亡後, 靈魂會喺我哋嘅維度裡停留一段時間, 而因為毛孩無條件愛我哋, 所以即使佢哋肉身已離開, 但我哋仍會感受到佢哋嘅陪伴, 慢慢佢哋就會離開去下一個緯度另一空間!
的確, 近來我已經無感受到波波嘅存在, 有啲失落, 但諗諗佢可以喺另一空間生活得習慣, 我應該放下!
喺一個落住毛毛雨嘅早晨, 突然腦中浮起詩人白居易嘅一首抒情詩- 「夜雨」
"我有所念人, 隔在遠遠鄉。 我有所感事, 結在深深腸"
望住窗外面嘅細雨, 個心好鬱悶, 咁啱老公放假可以睇住達達, 我想落平台行吓!
波波離開後, 第一次獨自一個人慢慢行, 仔細感受曾經同佢一齊行過嘅路, 回想同佢一齊嘅每個瞬間, 拎起手機一路行一路影相, 相同嘅場景但感覺已經唔同晒!
3隻豬仔, 只剩返年事已高心仔有病嘅達達, 佢哋曾經帶比我嘅開心再搵唔返!
已經過咗242日, 心情已經可以沈澱落嚟, 但睹物思人, 仍避唔過眼眶紅晒; 回憶真係一劑隱形毒藥, 望住手機裡面拍下嘅相片, 相同場景, 但空蕩蕩無咗相同身影, 展現出強烈對比, 惆悵無限!
今次用咗好好聽嘅歌‘Memory’, 去做咗呢個視頻, 主唱者滿滿感情嘅歌聲, 加添咗淡淡哀愁, 我被觸動得又想喊😖!
 |
| mp4 - Memory |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
