達達最近健康情況反差好大, 表現就如過山車咁忽高忽低, 好嘅時候會自己乖乖進食, 唔使拎住個碟放口邊不停鼓勵, 代表胃口好好因為唔使手餵; 養高齡豬仔要求真係會越來越低, 去到手餵肯吞就餵都無所謂, 最怕係對食物抗拒一路餵一路吐, 千百種食材配搭每次要唔同, 不停諗計仔....
養高齡毛寶嘅家長一定有共鳴, 我已經行過好多次呢條路, 祇要佢肯食點刁鑽嘅配搭都在所不計!
早幾日達達嘔咗一次, 其實間中腸胃不適係好小事, 但對老人家又差啲, 自我復原機制遲緩怕引發其他事, 見佢嘔完後精神又唔好, 都要特別留意!
好彩有繼續租用制氧機, 見佢精神麻麻我放咗佢落箱聞氧氣, 明顯補充氧氣後佢精神體力有好啲, 當然氧氣治療唔係萬能, 用得不當會適得其反仲累事; 但生理性缺氧, 例如隨著年齡增長, 組織器官退行性改變導致機體供氧能力不足, 或者病理性缺氧, 正如達達心肺問題導致攜氧能力不足等, 就好適合吸氧氣!
依家我租機主要用作後備, 達達心仔有事有肺壓高情況, 隨時需要借助氧氣, 萬一急用又租唔到機就死; 目前都祇係保養為主, 每日比佢落去聞幾小時, 為細胞補充氧氣!
最近睇咗幾篇文章講到氧氣, 我覺得大家可以做個參考, 文中講及一般市面上出售嘅制氧機, 氧流量1L/min, 氧氣濃度可維持喺90%, 氧流量2L/min, 氧氣濃度已下降到50%, 氧流量3L/min, 氧氣濃度再下降到40%, 氧流量5L/min, 氧氣濃度祇餘30%; 而將呢種家用制氧機, 比毛孩放氧氣箱用於治療用途無意義, 因為90%氧氣濃度只1L/min唔夠, 去到5L/min, 氧氣濃度祇餘30%又無幫助, 所以呢類機種, 只可以作保養用!
原來計算氧氣濃度到達肺部有條公式, 大家有興趣可以按入呢條link, 如果毛孩無症狀純保養用, 呢種家用制養機還好, 我都有一部以前比佢哋保養用!
但如果心肺功能弱, 氣管下塌等問題, 需求氧氣濃度要吸入29% - 35%之間先有幫助, 咁就要醫療級別嘅制氧氧機喇; 我選用租機, 因為有師傅定時上門check住出氧嘅濃度, 我放心好多!
曾經自己都有過confused, 又話吸入過高氧氣, 高於60%/min就會中毒, 咁使乜要部機出90%咁高?
原來部機釋放90%氧氣3L/min, 到達肺部都只係31.33%濃度, 亦都係要有呢個濃度對治療先有幫助, 保健用嘅制氧機, 釋放30%氧氣3L/min, 到達肺部都只係22.2%濃度, 只比空氣嘅21%高咗1.2%, 幫唔到有症狀嘅毛寶寶!
希望呢篇BLOG對吸氧問題有疑問嘅毛孩家長有幫助, 雖然吸氧對病情無法逆轉, 但肯定當佢哋呼吸有障礙時會較舒服!
如何指導患者選擇制氧機？https://kknews.cc/health/q39xvzo.html
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
