波波離開第9個月, 每晚瞓覺我都一定拎埋佢個帳篷床仔入房, 日間放出廳, 同往常一樣, 跟住冷氣定位; 不過我好耐無感覺到佢有返嚟了, 可能佢正適應新生活依家好忙!
有時會攬住佢抱枕, 問佢仲會唔會再返嚟? 不過唔緊要, 佢嘅意願一直係我考量嘅大前題!
我有滿滿乖仔嘅回憶陪伴, 即使回憶有時會帶比我傷感, 但亦同時帶比我安慰!mp4 - Memories
自從第一次做咗個陶土公仔, 又心思思想做埋其他4寶, 希望佢哋都齊齊返嚟; 雖然我無專業技巧, 有啲唔自量, 但阿女仍比我鼓勵, 佢話最重要過程得到滿足就已經有可為, 於是又向第二個公仔進發!
第二個做精精, 仍然係苦樂參半, 不停修改, 改到氣餒就喺放棄同堅持中拉鋸, 最後總算做咗個公仔出嚟, 唔敢要求相似度, 自我催眠阿Q話呢個就係精精😆!
本來都幾開心, 生活中有新嘗試, 有passion有鼓勵, 不過早幾日突然阿女話貓貓有唔妥, 又要搵醫生睇!
貓貓近排無胃口要手餵, 但無痾嘔精神無問題, 不過佢自細都腸胃唔好, 都係唔放心要帶佢比醫生睇睇.
驗血無問題, 一個紅色指數都無, 胰臟炎驗埋都無事, 全部指數都在正常範圍, 但無事無可能有咁奇怪行為; 為安全計, 決定再book埋專業外判, 不過要等一星期, 做埋超聲波睇睇!
點知去睇完醫生, 過咗一晩床邊發現有嘔吐物, 貓貓情況轉壞, 突然謝哂仲猛流口水, 呢個反應一定有問題!
即帶貓貓急診, 需要即時留院吊水打針, 打算留院daycare一日，點知留院期間貓貓有肚痾，醫生話唔走得！
由於診所夜間無人留守, 獨留貓貓阿女唔放心, 唯有夜間接走一早再送去!
醫生話如果擔心, 可以另加急診費用, 請專業超聲波醫生攝位, 即日照個超B睇睇!
加錢無問題, 已出症狀當然想盡快對症下藥, 但報告最快都要下個工作天先有得睇！
超聲波報告第二日已送到診所, 追問下告之係老問題, 但未知詳细！
貓貓daycare已幾日了, 琴晚接貓貓時, 姑娘通知唔需要再去, 約咗明日見醫生！
好可憐嘅貓貓, 真係好怕佢哋有病擔心死人; 達達之後我真係唔敢再養動物, 雖然係阿女嘅貓貓, 都一樣咁擔心, 呢種感覺太折磨人!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
