今日係達達15歲生日, 以一隻1.5kg嘅小型犬來講, 行到今日, 已經係比上不足, 比下有餘, 好叻女了!
不過唔讚得, 怕咗佢小器, 而且真係可以話佢好叻豬?
其實有好幾次, 都以為佢唔想再行落去, 但呢個女都唔知打咩主意, 一下間又好似無晒事, 都係老人家一貫狀態, 時好時壞, 今日唔知聽日事!
達達一歲半時接佢返嚟同波波作伴, 一晃眼間十幾年就過去, 仲記得當初帶佢返屋企, 佢係成個牛王女, 咬住波波條尾係咁扯, 無規無矩; 當時都有擔心波波唔夾佢, 以當時波波嘅狀態, 自己跣腳跌一跌都會休克咁豆腐, 點識配合佢?
 |
| 初返來時玩到癲起上來, 波波有啲怕咗佢 |
但真係好多謝呢個女, 訓練到波波變得勇者無懼, 從開始我擔心佢會蝦波波, 一直到我好放心將波波交比佢, 相親相愛做咗對神仙伴侶!
 |
| 好幸運兩隻豬仔好快已經磨合得非常融洽 |
十幾年無聲無息咁就過去, 波波亦已離佢而去, 雖然佢哋已天各一方, 但我相信波波喺天上會守護呢個好伴侶; 隨著時日嘅過去, 達達亦從一個牛黃妹變咗個刁蠻女, 不過灑脫滿不在乎嘅性格, 硬朗嘅作風, 仍係刻喺佢骨子裡!
達達從來都唔係一隻嗲嗲豬, 唔鍾意摟摟抱抱, 真係好似個俠女, 咁多年來有唔滿意都會好夠中氣大聲鬧, 即使到咗今日年華老去, 但仍性格剛烈, 嘈起上嚟一樣大聲夾惡, 呢樣真係服咗佢; 但公主心仔唔好啊, 咁激動唔係同自己過唔去, 係我怕咗佢!
 |
| 多謝達達嘅陪伴 |
感恩有達達公主, 喺波波離開我呢段日子, 比咗我好多支持, 有佢陪喺我身邊係重要支柱, 甚至, 只要呢個空間有佢嘅存在, 生活仲係有唔同意義, 聽佢惡騰騰聲大大咁鬧鬼, 都係一種樂趣; 呢年來, 我發覺自己好依賴佢!
喺佢15歲生日呢一日, 祇祈求未來每一日, 佢繼續享有平安喜樂嘅生活, 唔要經歷大風大雨, 有唔滿意仍可大聲鬧, 不過唔好咁勞氣😊.....
祝福我嘅達達公主, 祝願我哋享有更多相愛相守嘅日子 💗🙏!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
