天氣轉涼, 天氣變化對年紀大又有長期病患嘅毛寶寶, 當然有一定壓力, 即使我做足準備, 但達達仍然一連兩日嘔咗兩次😣!
不過達達係一隻意志堅強嘅豬仔, 我信呢啲小毛小病佢挺得住!
如常一個人落去散步, 今日偶遇一隻迷你松松, 我感覺好眼熟, 好自然就停下腳步; 然後同主人攀談幾句, 我話我都係養松松!
情不自禁做咗啲老土舉動, show出同三隻豬一齊嘅相片, 好意外聽到佢一句說話衝口而出....
佢話佢認得呢三隻松松, 通常坐住車仔, 一個一個咁輪住落地做步行運動…
係呀我一直怕突然有放繩狗向住豬仔暴衝, 萬一遇到惡狗情緒失控, 到時手忙腳亂一對三救唔到(唔會預計工人姐姐會拼老命幫得到啦)!
 |
| 一個一個輪住落地行 |
原來以前大家walk dog時有過傾談, 不過依家大家都戴住口罩, 最主要我又無豬仔陪伴只係自己獨行, 大家一直都係認狗唔認人啦!
佢話幾個街坊狗友都有曽講起, 點解好長時間無再見我哋出動?
唉, 原來街坊都有留意呢三隻松松, 但話題轉到呢個重點, 真係一言難盡.…
簡短交待幾句對孖B已上咗彩虹橋了, 剩返個刁蠻公主唔太鍾意外出, 心仔又唔好, 唔想勉強怕佢情緒太波動!
大家都好感慨狗狗嘅一生只有十幾年時間, 佢話佢嘅狗狗今年都13, 都有毛病喺腎同眼!
講起呢種話題心情有啲沉重, 都係分道揚鑣自己繼續前行!
四季如常換轉, 人生皆回憶, 且行且珍惜吧!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
