 |
| 相片連結 |
平安夜, 波波、達達祝大家平平安安, 聖誕快樂!
阿女無啦啦買咗幾個聖誕擺飾比我, 我自己又訂做咗個 3豬吊飾, 順理成章同兩隻豬仔影番幾張相, 依家無興趣做大project, 但亦唔抗拒叫佢哋坐埋去影幾張嘅!
聖誕快樂, 問我自己是否快樂? 我都唔識點講, 好似無時安樂😅; 當然比較起之前, 兩隻豬都唔肯食要force feed, 依家真係好好多, 波波胃口好好, 個屁股仔好好肉肉, 達達亦肯自己開動, 食得幾好, 而且精神都唔錯, 理應係好滿足!
不過....
 |
| 好期望呢隻保健品幫到波波 |
波波做常規尿液檢查, 蛋白尿又高咗, 依家試用藻心沛去幫助, 希望有改善唔使再加藥, 比D時間希望會見到成果, 都祇可以盡做無可奈何!
以前, 我會比較負面咁去想, 但依家見得太多朋友狗狗個案, 自己亦經歷過七上八落, 會有少少睇開咗, 俗語都講, "該死唔使病"嘛😂!
達達嘛, 突然見到佢眼仔好唔妥, 好似有撻嘢係眼珠下方, 眼仔中心有D凸起, 感覺有紅, 一見到咁我好驚啊; 但無得驚, 即刻book眼科, 要求插隊, 但碰啱兩日假期, 插隊都要等到星期四啊😟; 正常熊醫生祇返星期一、五, 今次剛好調咗假, 我已經好幸運, 亦多謝姑娘安排盡快比位我, 好理解我擔心; 希望達達頂住唔好惡化, 過兩日去check吓到底又有乜唔妥啦!
唉, 又係眼仔問題, 達達一直眼仔好精靈, 點解又嚟嚇我? 今次我會問多D, 要瞭解清楚!
依家有關眼仔問題我超敏感, 好遺憾之前對波波情況唔夠警覺, 醫生話正常我無再追問, 累佢睇唔到係我嘅錯😭!
唉, 固然呢D祇係我自己感覺, 覺得醫生之前判斷係輕率咗, 但自己都有責任啊; 幾權威嘅專科, 都唔及得媽媽每日觀察嘅結果, 我應該多提問, 而唔係信專科兩個字啊😖...
追唔返, 祇有向前望!
早前有群組媽媽分享, 話醫生對佢咁講, 唔好太在意檢查報告, 有時點努力點嘗試, 指數高咗都好難回落; 我哋要做嘅唔係為個報告嘅數字去努力, 係要狗狗生存質素好, 只要佢哋生活一切如常, 唔好自尋煩惱, 唔好糾纏於要報告數字永遠最靚最好; 所有生命都唔會所謂越戰越強, 年紀大咗健康走下坡好正常, 世間邊有不死藥? 卡通片先有千年女皇😂!
睇完比較開竅, 唔會再抱怨自己做咗咁多, 結果都唔理想, 應該相信如果我無咁做, 可能健康衰退得更早, 可能保持唔到正常嘅生活質素!
我會盡力去做, 會一直keep住為佢哋鋪一條較好行嘅路, 令佢哋有生之年少D痛苦, 其他唔再太在乎!
之前再買咗一套加大size遠紅外線治療毯套裝, 上次買嘅係比豬仔, 今次自己用, 今次仲有兩個大枕套, 呢兩個枕套當然分享比毛寶寶, 貓貓狗狗各佔一個套👍!
 |
| 兩隻豬一齊瞓, 幾鍾意咁喎! |
為咗呢個套, 專程訂咗個慢回彈記憶棉墊, 等兩隻豬仔肌肉筋骨承托力更好; 比佢哋好好享有遠紅外線毯保護之餘, 加上慢回彈棉協調身體機能, 保持肌腱韌帶柔軟同放鬆, 唔好再有咁多痛痛; 達達鍾意靠邊瞓, 即刻做咗個圍邊, 佢會更舒服😊!
呢D小事我可以即刻做, 但唔可以由我控制嘅, 都祇能盡人事做好!
 |
| 好舒服咁喎! |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
