呢幾日達達好醒目, 明顯見到佢有進步😁👍!
好感恩上天比我留意到藻心沛, 一隻咁好嘅補充品, 更感恩達達身體可以接受!
當然唔可以話加入咗呢隻產品達達成績驕人, 都只係見到佢有improvement, 其中因素亦未必只因呢隻產品, 亦要配合埋順勢療劑同其他補健品, 但可以唔用西藥, 而見到情況有改善, 我已經好開心!
雖然我無帶佢見醫生, 無數據支持我嘅講法是否真實, 但有好轉還是有唔好嘅反應, 首先都係靠目測, 正常判斷佢哋身體狀況, 一般都係睇日常反應, 是否有胃口? 有無精神? 行動有無偏差等等....
呢D係重要指標, 無可能不停做化驗咁頻密!
近來見到達達最明顯嘅分別係用餐時間, 大部分時間都肯乖乖企定定自己食晒, 偶然唔對胃口, 我都可以用匙羹手餵, 唔使用針筒force feed咁慘, 之前有一段日子真係好麻煩, 達達好惡死又刁蠻, 佢唔似以前豆b咁乖, 用針筒餵食好艱難, 搞到天一半地一半大家都污糟邋遢!
但唔可以任佢唔食嘛, 細身狗狗好易血糖低, 我好怕佢暈低就慘啦, 嗰段時間真係無曬心機, 連寫blog呻吓都無心情, 好慘!
 |
| 兩個都好乖乖, 好快食清晒👍😄 |
感謝老天指引我有一條生路行, 亦不枉我努力堅持去硬撐, 前路仍未知有幾多阻滯, 但我有勇氣有決心排解萬難, 目前就享受眼前嘅成果, 最開心見隻刁蠻公主自己食餐, 兩隻豬食得瞓得, 大小便無困難, 維持到基本生活質素, 係我一直期盼; 一件再平凡不過嘅日常事, 但足夠令我終日展歡顏😄!
打算比波波都食埋藻心沛喇, 做咗好多research, 褐藻醣膠對心、腦、腎都有卓越功效, 更指明對用於蛋白尿做過研究, 蛋白尿有顯著降低, 加強到對腎臟保護作用啊; 亦曾電郵生產商, 都比到我正面嘅評價, 希望波波都夾, 一如達達接受得咁好啦!
Link:褐藻醣膠(Fucoidan)對慢性腎病變之抑制作用及機制探討
腎保護fucoidian 褐藻多醣硫酸酯
波波近日表現就麻麻喇, 佢精神胃口都唔差, 但腳仔真係情況唔好, 行到跛吓跛吓😖!
明明之前已經有改善, 都叫做行動正常返, 雖然比往常緩慢, 但諗住比多D時間, 配合日常保健會慢慢好返嘛; 可能天氣轉冷, 近日又行得差返, 還好無影饗佢poo poo, 仲夠力紮馬😅!
目前我都只可以監察住天氣變化, 調好室內溫度濕度唔好有太大偏差, 再幫佢密D做物理治療, 利用紅外線熱敷等等, 希望可以做好復健啦; 一定唔會考慮入侵性治療喇, 希望天氣回暖佢會有進步, 都只能望天打卦!
 |
| 溫度濕度都合格😜 |
又開始忙餐死喇, 阿女又要出差, 今個月仲要出門兩次, 我又要去照顧貓貓, 整個月都唔得閒😓; 唯一祈求貓貓狗狗身體都在正常狀態, 只係兩頭騰消耗體力, 夜間可以好好瞓一覺補充返, 最怕最怕就係佢哋健康有麻煩, 擔驚受怕嗰種壓力太大!
正能量面對啦, 為無發生嘅事去擔心好笨蛋, 今後要多D練習順勢而行, 一直都係知易行難; 隨住時日過去, 喺新嘅一年我一定要做得更好, 仲有好大進步空間😆💪💪💪!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
