等咗幾日, 終於今日帶達達見眼科, 要求波波一齊覆診, 本來波波一早係約咗幾日後見醫生, 可以相就到的話, 就唔使我再去多次, 聽日阿女又出門, 我又要去照顧貓貓真係忙到暈!
假期後診所超多人, 我同老公全程都企出門口, 怕咗波波吠狗又吠人; 其實波波已經好少吠, 但佢感覺到要見醫生, 總係有不安要鬧吓人!
門外等咗一陣, 姑娘向我招手, 我一踏入門口, 姑娘話要嘟吓達達晶片, 隻刁蠻女已經惡到要食人...
達達真係幸運, 得到萬千寵愛, 即使猛鬧人, 個個姑娘都話佢惡死都得意過人, 對佢又鍚又氹; 然後見醫生, 醫生第一眼就話佢可愛到暈, 達達就唔領情, 見醫生靠近, 仲要眼對眼望, 仲唔吹鬚睩眼, 大聲叫喊嘈到嚇死人!
達達每次吠都係單音, 從來都係吖、吖、吖一聲一聲咁叫喊, 我以為佢腦退化唔識好似正常狗狗咁吠, 原來佢係可以連珠砲發, 一連串咁鬧醫生㗎😂!
唉, 檢查咁耐就嘈咁耐, 我又擔心佢脷仔黑, 真折騰😢!
熊醫生好好人, 好有耐心, 做吓檢查又停吓, 每做完一個檢查環節後, 都比公主休息一陣!
今次檢查做咗好耐, 檢查得好細心, 結果叫我唔使擔心, 話達達角膜有紅筋, 但唔知點解會有, 某D狗狗年紀大咗會咁, 唔影響視力, 今次眼仔撻野係血塊, 可能係微絲血管爆, 過耐D應該會消失!
眼仔無發炎, 無乾眼好乾淨, 眼底眼壓都正常, 咁當然年紀問題有自然老化現象, 但視力好正常; 然後, 醫生話同佢做吓健康檢查, 聽吓心肺啦, 結果同馮醫生講嘅一樣, 有3級心雜音, 肺好清暫時無須擔心, 留意住呼吸, 有氣速有咳要記得即時見醫生!
達達真巴閉, 波波覆診咁多次眼仔都無呢個優惠, 個曳女真係得人歡心😁!
之後到波波, 眼壓18都在正常範圍, 但我話佢間中有卒眼...
熊醫生話眼壓係會有上落, 有可能喺檢查時已回落, 但唔知平日有無曾經超標高過25, 佢感覺有唔舒服所以卒眼; 根據呢一年嘅檢查紀錄, 佢每次都有升高少少, 都怕佢有眼壓升高嘅趨勢, 到高到超標先控制就麻煩, 不如開始用降眼壓藥做個預防啦; 反正我目標只係想平穩過渡唔使摘眼, 祇要佢對隻藥無敏感, 滴降眼壓藥都係無壞嘅; 唉, 都要滴啦, 控制到就好, 身體已經有好多其他問題要兼顧喇😩!
然後要求熊醫生都幫波波聽聽心肺, 波波心肺都清, 無雜音無心律不正問題, 好感恩🙏!
兩隻豬去完見醫生返嚟, 好似打咗一場仗, 攰到即刻瞓到昏迷咁; 每次見醫生都崩潰得咁徹底, 無一定必要我都唔想難為佢哋去見醫生, 但有需要時真係唔敢等嘛!
希望老天庇佑, 身體唔好有大問題, 可以少D見醫生啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
