又老咗一歲😜!
好感恩兩隻豬仔仍陪伴喺我身邊, 以前生日都無刻意同佢哋影合照, 近幾年就提醒自己要同佢哋影相留念; 有佢哋陪伴係最好嘅生日禮物, 好可惜豆b已經缺席咗有三年, 以前同佢一齊影嘅合照又好少😣!
祝自己生日快樂身體健康, 吹臘燭許願, 但願往後嘅生日, 兩隻寶貝仍可相伴我好多年, 大家都身體康健🙏!
今日翻開一年前嘅生日貼文, 原來當日仲考慮緊比波波用bumper ring, 呢一年來已經試過亦quit咗, 波波唔習慣戴上異物, 用咗後仲行到腳步窒窒!
呢一年來, 為個仔諗咗好多方案, 希望佢一如大家咁講, 動物適應力強, 好希望佢好似其他失明狗狗一樣, 失去視力唔會做成太大殘障...
可惜波波性格柔弱亦唔堅強, 一年來結果都係打敗仗, 適應力唔強😟; 呢一年來, 佢倚賴我多咗, 時刻都要黐住我, 無咗我把聲做導航, 佢完全失去方向; 我曾承諾會做佢雙眼做佢導航拐杖, 一定會扶持到最後, 唔會硬逼佢逞強!
 |
| 食少少strawberry, 一齊分享😋😁! |
波波右眼有萎縮, Dr Hung話佢左眼晶體亦已移向前房, 兩隻眼都唔正常; 唉, 都已經睇唔到, 最壞嘅已遇到, 明白情況唔會轉好, 亦知道呢D都屬白內障成熟期, 趨向有嘅後遺症現象, 但仍希望佢平穏過渡, 唔使摘眼, 平平安安; 年紀漸大, 見佢各方面都緩緩走下坡, 即使知道係正常生理現象, 仍難免心傷!
達達心臟有雜音, 健康情況亦已警號響, 已經各方面保護都加強, 不停做research睇仲有邊方面可以幫得上; 兩隻豬都12歲喇, 健康下滑亦尋常, 但願達達嘅腦同心, 波波嘅眼同腎都控制好, 我要加油更堅強; 祈求自己身體健康, 要有更多精力, 將兩隻豬好好照顧到地老天荒!
近來兩隻豬健康情況算穩定, 當然無化驗報告支持我咁講, 我祇係base on 佢哋日常起居生活, 算正正常常; 但好似以前咁, 定時定候見醫生做化驗, 拎住個報告又有幾大幫忙?
決定無大變化少D見醫生, 唔再focus喺報告數字上, 比佢哋過得安安樂樂, 減少到診所嘅壓力, 可能仲健康!
阿女話一家人出去食餐飯啦, 生日一年祇有一次, 出去食個生日飯都不足為過, 呢幾年大部份親友嘅聚會我都已經quit 咗, 生活已經無晒自我😅...
兩隻豬近來無咩特別唔妥, 就離開一陣咁多, 要帶我去食西班牙菜, 呢個地點就近, 好味道出晒名, 一定要我去品嚐😋!
情商工人姐姐放假日早D返嚟, 點都要有人幫忙睇住, 有事及時通報先敢出去啊; 阿女話怕咗我, 出去一陣咁多張羅, 叫我情緒要放鬆, 唔好成日諗住意外有咁多, 其實最唔健康嗰個係我😝!
呢幾日自己都病咗, 同佢哋沖涼身水身汗, 一吹風就中招, 感冒到第一次鼻樑骨都痛啊; 不過阿女咁有心, 就出去行吓囉, 做宅女係會諗多咗, 我都知咁係唔妥 😅!
今日頗有感觸, 送上一首好歌同大家分享~
"為何 在遊蕩裡 在遊玩裡 突然便老去...
祈求 舊人萬歲 舊情萬歲 別隨便老去
時光 這個壞人 偏卻決絕如許
停留耐些 也不許..."
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
