波波食咗Antinol已經 4個幾月, 但對佢膝關節無幫助, 其實呢個結果我預咗, 都知道結構性問題無得幫, 但我唔想乜都唔做祇係觀望, 希望幫得嘅都盡量幫忙!
反正關節supplement都係要補充, 而呢隻又係天然成份, 就繼續食啦!
剛補貨, 就睇到另一隻天然成份嘅新產品...
呢隻係來自澳洲嘅純天然關節保健食品, 原材料係用野生玫瑰果提煉加工, 有效提取並活化玫瑰果中天然GOPO成分...
經科學證實, GOPO能有效減低犬隻的關節炎及其引致的痛楚, 同時支持免疫系統反應, 改善整體健康, 令毛色更靚; 唔係每隻玫瑰果產品都有辦法提煉到GOPO成分, 而其他無GOPO成分嘅玫瑰果產品, 並唔具備呢個功效嘅!
當然有同產品代理溝通, 主要問吓波波可否食用, 幫唔幫到都係後話喇, 最緊要唔好影響到佢嘅蛋白尿藥先得!
回覆係產品成分天然, 用100%純玫瑰果粉, 純植物製劑, 裡面無其他任何成分, 無負作用, 經臨床科學研究, 未發現有不良反應或禁忌症, 亦未發現同其他藥物或其他保健產品有衝突.
呢隻玫瑰果粉有助於減低血液中白細胞對關節部位嘅攻擊, 減少自由基, 提升整體免疫力, 有超過30份科學臨床驗證, 對狗狗係安全嘅, 可以放心!
講真自己都知大概, 明白食咩都唔可能將膝蓋骨復位, 但都有提及波波係膝關節異位問題; 代理回覆, 喺澳洲有遇到過關節發育異常、十字韌帶受損嘅情況, 產品都幫到嗰D狗狗, 當然目前唔知係咪可以幫到膝關節異位呢啲結構性問題, 但一定可以緩解因膝關節異位引起嘅痛楚, 代理話不妨試吓啊!
祇要成份天然, 又同波波嘅藥無conflict, 我梗係試啦, 不過最重要係波波肯食啦; 問咗代理味道如何, 佢話玫瑰果係天然嘅酸酸甜甜味道, 大部份狗狗都好接受!
食咗三日喇, 波波接受到係完全無問題, 真開心; 依家就等, 等時間引証效果, 當然要比時間唔可以太心急啦!
繼續努力, 唔放棄肌肉鍛鍊, 再加上新嘅補充品, 希望有少少improvement, 我已經好開心!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
