2020年1月23日星期四

平平安安

要鋪好遠紅外線氈比兩隻皇帝豬仔

近來都真係無覺好瞓, 事關波波都要上大床, 一家四口瞓埋一齊我要時刻提高警覺, 好怕壓死兩隻豬仔, 晚晚半睡半醒好攞命!
一隻達達豬OK, 佢又比較易處理, 唔會成日換位轉來轉去, 唔似波波咁難服侍; 但我真係唔可以拒絕波波, 自從佢眼仔睇唔到, 我更加放任咁縱容佢, 佢要嘅我都盡量滿足佢!
以前波波自己一個瞓網床, 佢瞓得好安樂, 咁就最理想, 但最近就唔合作!

達達跟我瞓已經時間頗長, 自從佢確診心有雜音, 又試過突然深夜尖叫, 之後每晚瞓覺我都放佢喺我附近, 確保有事我可以第一時間跳起身, 急救都觸手可及; 波波嘛touch wood無咩緊急, 就由得佢自己瞓, 唔知點解近來咁黐身, 晚上都要黐住我瞓!
唔捨得佢唔開心, 寧願自己花D精神, 不過阿女就提醒我要自己打好底唔好夜瞓, 要維持良好抵抗力因為怕武漢肺炎會陸續有確診, 要小心!
不過佢自己都病咗, 皆因每年近年尾工作特忙又唔夠瞓!

大家都要小心, 但願唔再有新武漢肺炎確診, 有過sars一役大家都應該會提高警覺做好衛生!

多謝A送比兩隻豬仔靚靚揮春, 最重要係「平平安安」呢四個字, 呢個祝福我哋唔會客氣, 內中含意我哋一定照單全收 !

同大家分享, 祝福大家都平平安安, 開開心心迎接鼠年來臨!