2020年1月7日星期二

人生樂事

阿女又飛, 近來好似密密出差我變相忙死, 不過佢話比起以前已經飛少咗, 可能我要兩頭跑感覺強烈D卦!
一日跑 3次去餵貓B, 兩隻豬仔又要食3餐, 仲要又湯又水咁服侍, 真係精神體力少D都頂唔住!

嗲嗲貓咪

但毛孩有如小BB, 只要佢哋身體健康無事, 叫我一日24小時對住, 我都覺得係人生樂事, 最最最怕佢哋身體𣎴適時唔識表達, 我除咗擔心, 都係一味靠估, 未必能夠第一時間幫到佢哋!
每次都係咁講, 希望4隻豬B爭氣, 千萬唔好有事, 我實在handle唔到突發性嘅case, 一齊玩吓餵食係平常時, 忙都開心樂意!

達達呢排間中會打嗝, 感覺佢有D胃氣, 可能胃脹頂住佢胃口麻麻哋, 呢D情況我都唔係好識處理, 唯有少食多餐希望OK啦!
達達男仔脾氣, 比較硬朗唔會少少唔舒服就表現到要死, 佢最叻豬!

感覺波波唔鍾意架輪椅, 佢都係prefer我用步行輔助帶帶住佢, 一心以為放佢落去輪椅佢會感覺自由D, 有咗4個轆幫助, 佢行去邊都可以, 但個重點我竟然忘記!
佢一定要媽媽帶住先敢行, 坐上輪椅學行都一定要我用聲音導航先夠膽, 如果我只放佢上輪椅, 以為佢會自己摸索放膽橫衝直撞, 真係太妄想喇, 都係自己一廂情願想多咗啦!

用前手撐住唔肯行😖

波波膝蓋未出事前佢都已經唔係好肯行, 主因係佢雙眼, 佢睇唔到變得更细膽, 呢個係佢性格; 我好記得當年我未遇上波波, 已經喺網上某forum讀到對佢嘅評價!

當時係S媽媽負責湊豆豆同波波呢兩隻B, 取名紅豆綠豆, 當日S媽媽就曾有呢個講法, 佢話紅豆家姐好大膽, 細細個已經有烈女稱號, 好似隻馬騮仔咁爬上爬落乜都唔怕, 鍾意探索世界; 但綠豆細佬完全相反, 好細膽成日縮埋, 鵪鶉性格!
緣份呢樣嘢好奇怪, 當年從網上認識嘅一對twins, 竟然先後做咗我嘅心肝寶貝仔女啊!

細佬習慣縮喺家姐背後

我係嗰種緊張媽媽, 當年決定帶手板咁大嘅波波返家, 戰戰兢兢將佢捧於手心慌死養唔大, 未養過咁細身嘅BB嘛; 一直小心翼翼咁呵護, 又好心做壞事啦; 呢個仔先天性格加上後天比我呢個怪獸媽媽培養, 佢更細膽, 我承認係我令到波波無咗獨立能力去闖難關!
所以佢無其他狗狗咁强嘅適應能力, 一切習慣倚賴, 當佢墮入咗黑暗嘅世界, 可以想像佢有幾慘, 更離唔開媽媽喇!

好幸福兩姐弟分開多年後可以再重遇

一切無得從頭行, 不過即使叫我從新來過, 可能我嘅養育方法都係咁選擇, 還好豆b跟我嘅時候已經長大, developed 咗穩定嘅性格, 我嘅緊張對佢影響唔太大!
所以豆b親善, 大方, 人見人愛, 波波就蛇蛇呱呱祇黐住媽媽, 又小霸皇性格!
一切係我做成, 唔可以怪波波, 今日佢睇唔到行唔好, 我都會一如以往捧住佢如珍寶, 會更愛惜更保護, 定會陪住佢行到最後一步!