不經不覺, 波波已經離開咗3個月, 心情平復咗好多, 但好多時都會做出一啲無意識嘅動作, 就好似佢仍在.....
例如往日我坐喺電腦檯前, 隔無遠嘅波波就瞓喺我大床, 往常我如果要行一行開, 即使加咗床欄, 我都一定會拎個枕頭放喺缺口位置再擋擋! 佢碰到有阻礙就會停止往前移動, 已經係我哋慣常嘅指定動作; 到咗今日, 已經過咗咁耐, 呢個習慣我都無改, 但一做完就會呆一呆, 然後個心會收緊惆悵又無奈!
自從睇咗新買嘅兩本書(我都未睇完張醫生嗰本, ), 領悟多咗; 我唔係第一次睇呢類書, 但呢本真係非常唔錯; 不過要有所得著, 都真係要喺right timing先有感覺!
不過領悟多咗, 相對都多咗難過, 書中所講真係好多都經歷過...
當毛孩病重, 一般媽媽都盡量想寶貝食得多, 偏執認為要食先有氣力打仗, 其實喺生命嘅倒數階段, 去到最後幾個月, 消化器官會紊亂, 就算勉強進食, 都未必可以吸收營養; 佢哋肯吞, 都係為咗照護者嘅感覺.....
生命嘅長度非我哋可以左右, 最後嘅日子, 佢哋需要嘅心理質素比生理質素更多!
我真係好後悔, 好後悔喺最後一刻, 仍餵波波baby food, 佢肯食全係為咗我, 為咗我那bull shit嘅感覺怕佢肚仔餓.....
我一直以為佢肯吞就係仲有需要, 因為以前嘅毛孩我都係餵到佢哋唔肯吞, 我就唔再勉強!
但波波, 佢為咗我好過, 為咗配合我, 佢食到嘔都祇因為愛我😭, 我嘅無知害乖仔辛苦咗, 我真係好難過!
還好喺最後嗰幾個月, 我有配合波波嘅留戀, 要我抱佢更多, 我抱到肩膀痛都唔捨得將佢放開, 佢應該同我一樣唔捨得話別, 無奈亦知道自己會好快離開我😭!
雖然波波實際上已經離開, 但我真係感覺佢嘅精神仍與我同在, 我仍感應到佢比我嘅愛, 係以前未有過嘅感覺; 當我想同佢傾偈時我就照往常咁同佢講, 當然無宣之於口, 免得老公以為我自言自語癡咗😉！
當然有好多個瞬間仍會感覺悲哀, 畢竟佢係14年朝夕陪伴住我, 經歷過好多高高低低嘅摯愛!
波波, 多謝你毫無保留付出你嘅愛, 多謝你以一生教導我更多, 多謝你喺我生命裡出現過!
來生, 當我哋再重逢時, 我一定會比今生做得更好, 你等我!!!!!
 |
| mp4 - 思念如線 |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
