 |
| 又一年喇, 天上嘅你哋生活得好嗎? |
2020即將過去, 仲有一日就踏入2021!
今日係除夕, 先祝大家新年快樂, 幸福安康, 平平安安！
"2020愛你愛你"字面咁溫馨, 但呢年真係辜負咗呢個咁浪漫嘅意境; 今年對全球都係一個大挑戰, 大家都努力抗疫, 希望跨過呢年, 好快可以控制到疫情!
我嘛, 喺同一天空下, 當然都感受到周圍嘅壓力, 最傷心當然係今年失去我最愛嘅波波, 每有觸動仍係會鼻酸眼淚滴!
每年嘅年尾, 都循例做大掃除, 早啲開始唔想逼到最尾, 斷捨離呢樣唔可以靠工人姐姐, 要丟棄嘅嘢一定要經過自己!
早幾日已經開始整理, 先清理廁所牆櫃, 每一格都望望有乜嘢要丟棄, 突然就見到波波嘅牙刷仔, 拎上手百般滋味....
三番死四次想放落垃圾箱, 最後都係唔可以捨棄, 最終原封不動放返原位.....
究竟要過幾耐, 我先可以用平常心將有關波波嘅嘢好好處理? 究竟要過幾耐我先可以對乖仔嘅離開從容面對?
努力咁清理, 點知閃到腰, 不止轉側有困難, 傷患疼痛蔓延到雙腿, 搞到寸步難移, 好似殘廢, 不過今日已經好返好多了!
 |
| mp4 - 阿拉斯加海灣 |
依家喺疫情影響下, 無必要都唔會出去, 大部分時間都困喺屋企; 我一向都係宅女, 其實對我無好大關係, 祇係因為波波嘅離開, 少咗出外走動整日困住, 就難免睹物思人多咗負面情緒!
達達近來脾氣有啲怪, 早幾日唔肯瞓自己張床仔, 抱佢上去佢就大聲嘈嘈閉, 係都要典過去波波果張先安靜落嚟; 之前每晚都肯入氧氣箱保養吓個心仔, 近來又好抗拒一放佢入去就吠!
之前體重有回升, 依家又跌返落嚟, 但佢精神胃口都正常, 瞓得好好呼吸平穩, 我真係睇唔到佢有乜嘢問題.....
達達近來脾氣有啲怪, 早幾日唔肯瞓自己張床仔, 抱佢上去佢就大聲嘈嘈閉, 係都要典過去波波果張先安靜落嚟; 之前每晚都肯入氧氣箱保養吓個心仔, 近來又好抗拒一放佢入去就吠!
唯有喺食物方面諗吓, 仲有乜嘢可以保養吓佢身體; 坊間最近好hit嘅滴雞精唔敢太密比佢飲, 怕太燥太補又出問題; 中醫角度豬肉比雞平和, 咁我就改做燉肉汁, 肉汁都可以益氣補身, 滴雞精就間疏D餵; bone broth當然要照常做, 達達依家好嘴刁, 食物加咗蛋殼粉又嫌唔好口感, 補鈣就要借助骨湯平衡; 盡量分配好羊奶同各款湯汁, 希望可以營養均衡！
年紀大身體吸收能力下降, 祇要佢無病痛嘅徵狀, 日常生活精精神神, 我就唔再作無謂擔心, 都祇可以盡心!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
